Takimi i paralajmëruar për sot pasdite mes kryeministrit në detyrë, Albin Kurti dhe komandantit të KFOR-it, gjeneralmajor Özkan Ulutaş, nuk është zhvilluar.
KFOR-i ka konfirmuar anulimin e takimit, duke bërë të ditur se shkak kanë qenë “rrethana të paparashikuara”, pa dhënë hollësi të tjera lidhur me arsyet.
Misioni i NATO-s në Kosovë ka theksuar se komandanti i KFOR-it vazhdon të mbajë kontakte të ngushta me partnerët, përfshirë përfaqësuesit e institucioneve të Kosovës.
Takimi Kurti–Ulutaş ishte paralajmëruar më herët gjatë ditës nga vetë kryeministri në detyrë, në kohën kur po diskutohet çështja e hapjes së plotë të urës kryesore mbi lumin Ibër në Mitrovicë.
Kurti kishte deklaruar se institucionet e Kosovës janë në komunikim të vazhdueshëm me KFOR-in për këtë çështje, duke thënë se ura nuk duhet të vazhdojë të mbetet e mbyllur për qarkullim të plotë.
Ai kishte paralajmëruar se këtë temë do ta diskutonte edhe në takimin e planifikuar me komandantin e KFOR-it.
Kurti: Pasditen e sotme takohem me Ulutashin për hapjen e Urës së Ibrit
