Të paktën 15 persona janë vrarë në sulmet e fundit ruse që synojnë kryeqytetin ukrainas, tha kryebashkiaku i Kievit, ndërsa Ukraina vazhdon të përballet me mungesë të raketave të mbrojtjes ajrore, ka raportuar BBC, transmeton Gazeta Express.
Blloqe apartamentesh dhe depo u goditën në të gjithë qytetin gjatë natës, tha Shërbimi Shtetëror i Emergjencave të Ukrainës, ndërsa një spital për fëmijë dhe një shkollë u dëmtuan gjithashtu.
Duke folur për BBC News në një bllok apartamentesh të rrënuar në Kiev, kryebashkiaku Vitali Klitschko tha se Ukraina kishte nevojë për “municione, sisteme anti-raketash – ne kemi nevojë për mbështetje nga partnerët tanë”.
Kiev mbështetet te aleatët perëndimorë për furnizimet dhe Presidenti Volodymyr Zelensky tha se “për sa kohë që Ukraina nuk ka mjaftueshëm anti-balistikë, Rusia nuk do të mendojë seriozisht për paqen”.
Ai shtoi: “Interceptorët për Patriotët nuk janë zëvendësuar ende dhe ato nevojiten çdo ditë. Çdo raketë shtesë shpëton jetën e popullit tonë”.
Një përditësim i lëshuar nga Forcat Ajrore Ukrainase të enjten në mëngjes nënkuptonte se asnjë nga raketat balistike ruse të përdorura gjatë natës nuk u interceptua.
Ukraina është mbështetur në furnizimet amerikane të raketave interceptuese Patriot për të luftuar raketat balistike ruse, por SHBA-të kanë përdorur pjesën më të madhe të rezervave të tyre gjatë luftës me Iranin.
The post Të paktën 15 të vrarë në Kiev, ndërsa Ukraina përballet me mungesa të mbrojtjes ajrore appeared first on Gazeta Express.
