Zëvendësdrejtori i Policisë së Kosovës për rajonin e Mitrovicës së Veriut, Veton Elshani, ka deklaruar për KosovaLive se situata në veri të vendit është e qetë, pas njoftimit për vendosjen e Policisë së Kosovës në atë pjesë.
Elshani tha se Policia e Kosovës është e pranishme në veri për të garantuar sigurinë e qytetarëve, rendin dhe qetësinë publike.
“Nuk ka ndonjë shqetësim. Nuk ka diçka të jashtë zakonshme, ne kemi qenë edhe më parë aty. Policia po bën detyrat e veta aty, sepse ne jemi aty për sigurinë e qytetarëve, për rendin dhe qetësinë publike”, tha Elshani.
Ai theksoi se pjesëtarët e Policisë kanë qëndruar më gjatë në veri, duke e vlerësuar situatën si delikate për shkak të mundësisë së ndonjë vendimi politik që mund të kërkojë ndërhyrjen e institucioneve të sigurisë.
“Ajo që është me rëndësi të thuhet është se Policia e Kosovës ka qasje në secilin vend të veriut. Në rast se ka nevojë për të ndërhyrë, atëherë do të ndërhyjmë”, deklaroi ai.
I pyetur nëse ka pasur reagime nga qytetarët serbë pas vendosjes së Policisë së Kosovës dhe tërheqjes së forcave, Elshani tha se nuk është raportuar ndonjë incident.
“Situata është e qetë dhe vazhdon të jetë e qetë. Nuk ka ndonjë problem për t’u theksuar”, tha ai.
The post Largimi i KFOR-it nga veriu, a pati reagime nga qytetarët serbë? Flet Veton Elshani appeared first on Gazeta Express.
