Dhoma e Tregtisë dhe Industrisë Kosovë (DHTIK) ka shprehur shqetësim për vonesat në konstituimin e Kuvendit dhe formimin e Qeverisë së Kosovës, duke paralajmëruar se mungesa e institucioneve funksionale po krijon pasiguri dhe po shkakton dëme të mëtejshme për ekonominë dhe bizneset vendore.
DHTIK u ka bërë thirrje partive politike parlamentare që të tejkalojnë ngërçin dhe të mundësojnë sa më shpejt funksionalizimin e institucioneve.
Sipas DHTIK, Kosovës i nevojiten institucione funksionale dhe vendimmarrje, ndërsa një cikël i ri zgjedhor do ta thellonte edhe më shumë pasigurinë për sektorin privat dhe ekonominë.
“Konstituimi i Kuvendit dhe formimi i Qeverisë janë të domosdoshme edhe për shkak të agjendës së madhe që e pret vendin në fushën ekonomike”, thuhet në reagimin e DHTIK-ut.
Në mesin e tyre përmenden Ligji për Tregti të Brendshme, Ligji për Falimentim, Ligji për Miniera dhe Minerale, Ligji i Punës, Ligji për Pushimin e Lehonisë, legjislacioni për TVSH-në, Ligji për Pronën Publike, Ligji për Investime Strategjike dhe Ligji për Shoqëritë Tregtare.
DHTIK vlerëson se këto çështje nuk mund të vazhdojnë të mbeten të bllokuara për shkak të mungesës së institucioneve.
“Bizneset kanë nevojë për siguri juridike, politika të parashikueshme, lehtësim të barrës administrative dhe fiskale, përkrahje për prodhimin vendor dhe investimet, si dhe një klimë më të favorshme për zhvillim”, theksohet në reagim.
DHTIK u ka kërkuar subjekteve politike që interesin e vendit dhe të ekonomisë ta vendosin mbi dallimet politike, duke përfunduar procesin e konstituimit të institucioneve.
Sipas Dhomës, qytetarëve dhe komunitetit të biznesit duhet t’u sigurohen institucione që funksionojnë, marrin vendime dhe mbajnë përgjegjësi.
