Kryetari i BDI-së, Ali Ahmeti, ka treguar prapaskenat e ndërmjetësimit të tij për pajtimin e Ramiz Lladrovcit me PDK-në, duke theksuar se këtë iniciativë e ndërmori vetë dhe pa u ftuar nga askush.
Ahmeti tha se me Ramiz Lladrovcin dhe Sami Lushtakun ka raporte miqësore dhe se ndërhyrjen e tij e bëri për shkak të lidhjeve të forta që ka me ta.
“Sinqerisht po them, askush nuk më ftoi. I kam shokë. Ramizin, Samin, unë jam në shtëpinë time, o vëlla. Këtu, nëse më përzini nga dera, hyj nga dritarja. Nëna ime është Kosova”, deklaroi Ahmeti.
Ai tregoi se fillimisht e kishte telefonuar Ramiz Lladrovcin, i cili ndodhej në Drenicë, dhe më pas kishte shkuar te Sami Lushtaku për të ndërmjetësuar.
“E kam thirrur Ramizin në telefon, ishte në Drenicë dhe kam shkuar. I kam thënë: ‘O djalë i mirë, këtu është Femi Lladrovci’ dhe nuk duhet keshtu. Pastaj shkova te Samiu dhe i thashë: ‘Nuk dal pa ma dhënë llafin’. Ai kishte ftuar shokët e tij dhe ma bëri me dije: ‘Mos hiq dorë prej kësaj pune’. U kry muhabeti, e thirra Bedriun: ‘Hajde ulemi’”, rrëfeu Ahmeti.
Ahmeti tha se e gjithë ndërhyrja ishte një iniciativë e tij personale, të cilën e cilësoi si “vëllazërore”. “Kjo ka qenë komplet iniciativë vëllazërore, sepse unë i dua, i dua sinqerisht. E di që vdesin për mua; nëse dikush i huaj ma prek dikë, gjak derdhin”, tha Ahmeti. /RTV21
The post Ahmeti tregon prapaskenat: Unë e nisa pajtimin e Lladrovcit me PDK-në appeared first on Gazeta Express.
