Lagjja Nuhaj është zhytur në pikëllim pas tragjedisë që i mori jetën tre anëtarëve të së njëjtës familje, të cilët humbën jetën në një aksident të rëndë rrugor.
Lajmi i kobshëm ka prekur thellë banorët e lagjes, të cilët kanë shprehur dhimbjen dhe solidaritetin me familjen e viktimave. Përmes një mesazhi prekës, një bashkëfshatar tha se kjo humbje ka lënë një plagë të rëndë në zemrat e të gjithë komunitetit.
“Lagjja jonë Nuhaj është mbuluar nga dhimbja. Humbja tragjike e tre anëtarëve të një familjeje në një aksident ka lënë zemrat tona të thyera. Nuk ka fjalë që e lehtësojnë këtë dhimbje”, thuhet në postimin e tij.
Në fund të mesazhit janë shprehur ngushëllimet më të sinqerta për familjen e të ndjerëve, me lutjen që Zoti t’i mëshirojë viktimat dhe t’u japë forcë familjarëve për ta përballuar këtë humbje të rëndë.
Ndërsa damilja Aliu ka konfirmuar aksidentin tragjik në të cilin humbën jetën tre mërgimtarë nga Komogllava e Ferizajt, teksa po ktheheshin nga Kosova drejt Gjermanisë.
Sipas familjarëve, viktimat ishin nisur nga Kosova të mërkurën, rreth orës 11:30, me destinacion Gjermaninë, ndërsa aksidenti ndodhi në orët e para të mëngjesit të së enjtes.
Familjarët kanë bërë të ditur se bëhet fjalë për një vetaksident dhe se në automjet ndodheshin vetëm tre personat që humbën jetën, pa pasagjerë të tjerë.
Si pasojë e aksidentit kanë humbur jetën Tahir Aliu (61 vjeç), djali i tij Gentian Aliu (34 vjeç) dhe Laurent Aliu (16 vjeç), duke lënë në pikëllim familjen, të afërmit dhe bashkëqytetarët.
Për aksidentin kanë raportuar edhe autoritetet gjermane, të cilat kanë konfirmuar se tre persona kanë humbur jetën si pasojë e një vetaksidenti. Rrethanat e plota të ngjarjes mbeten objekt i hetimeve nga organet kompetente në Gjermani.
The post “Nuk ka fjalë për këtë dhimbje”, lagjja Nuhaj në zi pas tragjedisë së tre kosovarëve në Gjermani! appeared first on Gazeta Express.
