Qytetarë janë mbledhur sërish këtë të mërkurë, më 5 gusht, në Sheshin “Skënderbej” në Tiranë, duke zhvilluar protestën e 67-të radhazi kundër qeverisë.
Pas grumbullimit në qendër të kryeqytetit, protestuesit marshuan përgjatë bulevardit drejt Kryeministrisë, duke vijuar me thirrje kundër qeverisë dhe klasës politike.
Gjatë tubimit u kërkua shfuqizimi i ndryshimeve në ligjin për zonat e mbrojtura, ndryshimi i ligjit zgjedhor, si dhe largimi i asaj që protestuesit e cilësuan si “kastë të vjetër politike”.
Protesta u shoqërua edhe me kundërshtime ndaj hartës së re territoriale të propozuar nga Partia Socialiste, e cila parashikon uljen e numrit të bashkive nga 61 në 46.
Protestuesit e kundërshtuan këtë nismë, duke pretenduar se ajo do të çojë në përqendrim të pushtetit lokal.
Aktivisti Edison Lika deklaroi se reforma administrative-territoriale do të kishte kaluar pa vëmendje publike, por sipas tij, protestat e vazhdueshme kanë ndikuar në rritjen e debatit rreth kësaj çështjeje.
“Propozimi për reformë të re administrative do të ishte kaluar pa u vënë re, por fakti se protesta ka qenë në shesh, i ka hapur probleme serioze Ramës”, u shpreh Lika.
Në protestë morën fjalën edhe qytetarë nga diaspora.
Një emigrant shqiptar që jeton në Itali bëri thirrje për vijimin e protestave dhe njoftoi për një manifestim të planifikuar në Genova.
Ai kërkoi që tubimet të mbeten jopartiake dhe u bëri apel qytetarëve që t’u bashkohen protestave.
“Duhet të jemi jopartiakë, sepse partitë na e kanë menderosur. Boll! Bashkohuni këtu në shesh”, deklaroi ai.
Një tjetër emigrant shqiptar nga Dibra, i cili jeton prej vitesh në Itali, kritikoi klasën politike dhe foli për largimin e tij nga Shqipëria, duke e lidhur atë me situatën politike dhe sociale në vend.
Protesta u zhvillua nën monitorimin e forcave të Policisë së Shtetit, ndërsa pjesëmarrësit vijuan marshimin përpara Kryeministrisë.
Tubimi, i cili fillimisht nisi si reagim kundër një projekti turistik në Zvërnec, me kalimin e kohës është zgjeruar në një lëvizje më të gjerë qytetare me kërkesa kundër korrupsionit dhe për ndryshime në qeverisje.
Pas më shumë se dy muajsh, protestuesit deklarojnë se do të vazhdojnë tubimet deri në përmbushjen e kërkesave të tyre, përfshirë edhe kërkesën për dorëheqjen e kryeministrit Edi Rama.
