Një person është arrestuar nën dyshimin për kanosje me armë zjarri në Brezovicë, në afërsi të qendrës së skijimit.
Sipas Policisë, rasti ka ndodhur më 5 gusht 2026, rreth orës 16:30, kur Stacioni Policor në Shtërpcë ka pranuar një informacion për një kanosje me armë zjarri.
Nga hetimet fillestare dyshohet se tre persona, të cilët po lëviznin me kuaj në një shteg të ngushtë malor, janë përballur me një person tjetër, i cili kishte lënë kalin e tij në rrugë dhe kishte refuzuar ta largonte për t’ua mundësuar kalimin.
Pas një mosmarrëveshjeje verbale, i dyshuari N.H., 65-vjeçar, shtetas i Republikës së Kosovës, dyshohet se ka nxjerrë një armë zjarri, pistoletë, dhe i ka kanosur tre personat, duke përdorur edhe fjalë fyese.
Për rastin është njoftuar prokurori i shtetit, i cili ka urdhëruar ndalimin e të dyshuarit për 48 orë, për procedura të mëtejme hetimore.
Policia Rajonale e Ferizajt ka bërë të ditur se mbetet e përkushtuar në trajtimin e rasteve që cenojnë sigurinë publike dhe ka apeluar te qytetarët që çdo veprim të kundërligjshëm ta raportojnë në polici.
