Drejtori i Institutit Octopus, Arben Fetoshi, në një vlerësim në rrjetin social Facebook është shprehur ndaj inaugurimit të monumentit për Brigadën e 37-të të Motorizuar të Ushtrisë Serbe në Rashkë, duke e cilësuar atë si një monument për “Botën Serbe” dhe një instrument të strategjisë hibride të Beogradit për rehabilitimin e politikës së Millosheviqit.
Sipas Fetoshit, nderimi i kësaj brigade, e cila lidhet me disa nga masakrat më të rënda ndaj civilëve shqiptarë dhe me fshehjen e trupave në varrezën masive të Rudnicës, përbën vazhdimësi të politikës së mohimit dhe glorifikimit të krimeve të luftës.
Ai thekson se, ndërkohë që Kosova vazhdon kërkimet për personat e zhdukur, Serbia jo vetëm që nuk hap arkivat ushtarake, por po ngre monumente për njësitë që kanë kryer dhe fshehur krime.
Fetoshi ka kritikuar edhe deklaratat e ministrit të Brendshëm të Serbisë, Ivica Daçiq, i cili i ka cilësuar pjesëtarët e Brigadës së 37-të si “heronj të luftës”, duke vlerësuar se kjo është pjesë e një lufte narrative që synon rehabilitimin e politikës së spastrimit etnik dhe legjitimimin e projektit të “Botës Serbe”.
Fetoshit po ashtu ka thënë se monumenti në Rashkë duhet të shërbejë si alarm për rajonin, Bashkimin Evropian dhe NATO-n.
