Ka shkuar në 20 numri i personave të vrarë si pasojë e sulmit masiv me dronë dhe raketa që Rusia kreu gjatë natës ndaj kryeqytetit të Ukrainës, Kievit.
Sipas autoriteteve lokale, dhjetëra janë plagosur nga sulmi, ndërsa ekipet e shpëtimit po vazhdojnë operacionet në zonat e goditura.
Shefi i Shtabit të Përgjithshëm të ushtrisë ruse, Valery Gerasimov, i ka raportuar presidentit rus Vladimir Putin për rezultatet e asaj që Kremlini e ka cilësuar si një “sulm masiv hakmarrës”, njoftoi zëdhënësi i Kremlinit, Dmitry Peskov, sipas agjencisë shtetërore ruse TASS.
Putin nuk ka bërë ende ndonjë deklaratë publike lidhur me sulmin ndaj Kievit.
Ndërkohë, autoritetet e metrosë së Kievit njoftuan se gjatë alarmit ajror të natës është regjistruar numri më i madh i njerëzve që janë strehuar ndonjëherë në stacionet nëntokësore vitet e fundit.
Gjithsej 52.500 persona, përfshirë afro 4.500 fëmijë, kaluan natën në stacionet e metrosë, të cilat shërbejnë si strehimore gjatë sulmeve ajrore. Në Kiev janë gjithsej 46 stacione nëntokësore që funksionojnë si strehimore.
