Kryeministri në detyrë, Albin Kurti, mori pjesë në konferencën “Gratë në Biznes – She Rises 2026”, e organizuar nga Ministria e Industrisë, Ndërmarrësisë, Tregtisë dhe Inovacionit.
Kurti vlerësoi rolin dhe kontributin e grave në zhvillimin ekonomik dhe shoqëror të vendit, duke theksuar se bizneset që ato drejtojnë, vendet e punës që krijojnë dhe sfidat që kapërcejnë ndikojnë drejtpërdrejt në forcimin e ekonomisë së Kosovës.
Ai nënvizoi se gratë po dëshmojnë lidership të suksesshëm edhe në institucionet shtetërore, duke udhëhequr procese të rëndësishme me profesionalizëm, integritet dhe përkushtim. Sipas tij, arritjet e grave në politikë tregojnë se, kur u ofrohen mundësi të barabarta, ato janë plotësisht të afta të marrin përgjegjësi dhe të sjellin rezultate.
Kurti tha se i njëjti progres duhet të reflektohet edhe në ekonomi, ndërmarrësi dhe pronësi biznesesh. Ai theksoi se pavarësia ekonomike e grave është një faktor kyç për ndërtimin e familjeve të forta, një shoqërie moderne dhe një ekonomie të qëndrueshme.
Duke iu drejtuar grave sipërmarrëse, kryeministri në detyrë u shpreh se suksesi i tyre është njëkohësisht sukses i Kosovës. Sipas tij, çdo biznes i udhëhequr nga gratë, çdo vend pune i hapur dhe çdo produkt që arrin në tregjet ndërkombëtare kontribuon në forcimin e imazhit dhe zhvillimit ekonomik të vendit.
“Është e domosdoshme që këtë sukses që po e shohim në sferën politike, ta shohim me të njëjtën dinamikë edhe në ekonomi, në ndërmarrësi, e në pronësi të bizneseve. Një grua ekonomikisht e pavarur është shtyllë e një familjeje të fortë, e një shoqërie përparimtare dhe e një ekonomie të zhvilluar”, tha kryeministri në detyrë.
