Policia e Kosovës ka arrestuar një person të dyshuar për përfshirje në shtatë raste të veprave penale kundër pasurisë në Gjakovë.
Sipas njoftimit të Drejtorisë Rajonale të Policisë në Gjakovë, i dyshuari me inicialet B.K. është identifikuar dhe arrestuar më 14 qershor 2026 pas veprimeve hetimore të zhvilluara nga Sektori i Hetimeve.
Ai dyshohet për pesë raste të veprës penale “Vjedhje e rëndë” dhe dy raste të veprës penale “Vjedhje”. Hetimet kanë siguruar prova që e lidhin të dyshuarin me rastet e raportuara, të cilat kryesisht kanë të bëjnë me thyerje dhe hyrje me forcë në lokale afariste në lokacione të ndryshme të qytetit të Gjakovës.
Sipas policisë, objekt i vjedhjeve kanë qenë kryesisht paratë e gatshme.
Pas arrestimit, B.K. është intervistuar në prani të avokatit mbrojtës dhe, përballë provave të siguruara, ka pranuar përgjegjësinë për disa nga veprat penale që i atribuohen.
Me vendim të Prokurorit të Shtetit, i dyshuari është ndaluar për 48 orë, ndërsa hetimet lidhur me rastin janë duke vazhduar.
