Komisioni Qendror i Zgjedhjeve (KQZ) ka njoftuar se në Qendrën e Numërimit dhe Rezultateve (QNR) po vazhdon procesi i numërimit të votave nga diaspora, ndërsa tashmë ka nisur edhe numërimi i fletëvotimeve të ardhura përmes postës.
Sipas njoftimit të KQZ-së, deri të shtunën në ora 09:00 janë numëruar 46 nga gjithsej 47 vendvotime të organizuara në përfaqësitë diplomatike të Kosovës jashtë vendit.
Votimi në përfaqësitë diplomatike është mbajtur më 6 qershor në 30 përfaqësi diplomatike në 18 shtete të ndryshme. Nga 27,724 shtetas të regjistruar për votim, të drejtën e votës e kanë shfrytëzuar 22,860 qytetarë, apo 82.46 për qind.
KQZ ka bërë të ditur se rezultatet e numërimit publikohen në mënyrë të vazhdueshme në platformën zyrtare të rezultateve, menjëherë pas përfundimit të numërimit për secilin vendvotim.
Ndërkohë, të premten në mbrëmje ka filluar edhe numërimi i fletëvotimeve nga votimi përmes postës. Procesi po zhvillohet për votat e ardhura në 23 kutitë postare të KQZ-së, të vendosura në shtete të ndryshme.
Sipas të dhënave të Komisionit, për votimin me postë ishin regjistruar rreth 105 mijë shtetas të Kosovës. Periudha e votimit përmes postës ka zgjatur nga 21 maji deri më 6 qershor 2026.
Më 8 qershor është përmbyllur procesi i tërheqjes së pakove me fletëvotime nga 22 shtete të ndryshme dhe nga kutia postare e KQZ-së në Kosovë. Nga gjithsej 23 kuti postare janë tërhequr mbi 85,700 pako të supozuara me fletëvotime.
Paralelisht me numërimin, në QNR po vazhdon edhe procesi i vlerësimit të pakove të ardhura përmes postës. Deri në fund të ditës së premte janë shqyrtuar më shumë se 60 mijë pako.
Nga to, 59,973 janë aprovuar, ndërsa 2,244 janë refuzuar. Arsyeja kryesore e refuzimit, sipas KQZ-së, ka qenë mungesa e dëftesës së regjistrimit, dokument i cili përmban të dhëna unike dhe u dërgohet votuesve të regjistruar nga Komisioni Qendror i Zgjedhjeve.
Procesi i numërimit dhe vlerësimit të votave të diasporës pritet të vazhdojë edhe gjatë ditëve në vijim deri në përmbylljen e plotë të rezultateve.
