Gazetari i TV Dukagjinit, Arian Hajdaraj ka raportuar nga terreni duke treguar procesin e votimit dhe mënyrën se si vendoset shenja në gisht pas votimit.
Ai ka thënë se, për kuriozitet, ka provuar vetë procesin në mënyrë demonstrative në qendrën e votimit me kusht në shkollën “Skënder Luarasi”, ku është shprehur se shenja e vendosur me marker është fshirë më lehtë se në proceset e kaluara.
“Pikërisht çështja e fundit e shenjës në gisht që vendoset nga një marker permanent. Për kuriozitet e kam provuar këtu ekskluzivisht në shkollën ‘Skënder Luarasi’. Kemi përdorur disa faculeta të lagura pa alkool. Shihet se ka mbetur fare pak shenja e markerit”, ka deklaruar gazetari.
Ai ka shtuar se edhe qytetarë të tjerë kanë raportuar për një dukuri të ngjashme gjatë procesit të votimit.
“Në shumicën e rasteve disa qytetarë kanë treguar se shenja po fshihet më lehtë dhe më shpejt. Vërtetë, shenja në gisht po fshihet më lehtë se herave të kaluara”, është shprehur ai.
Ndryshe, Qytetarët e Kosovës po votojnë këtë të diel në zgjedhjet e parakohshme parlamentare. Këto zgjedhje po mbahen pasi Kuvendi nuk arriti të zgjedhë presidentin brenda afateve të përcaktuara me Kushtetutë. Për qytetarët, kjo është hera e tretë brenda më pak se një viti e gjysmë që u drejtohen kutive të votimit për zgjedhje parlamentare.
Komisioni Qendror i Zgjedhjeve ka përfunduar të shtunën shpërndarjen e materialit zgjedhor në të gjitha komunat e vendit. Procesi është zhvilluar nën masa të shtuara sigurie, ndërsa materialet janë dërguar fillimisht nga qendra logjistike në Fushë-Kosovë drejt 38 komunave.
Zëdhënësi i KQZ-së, Valmir Elezi, ka bërë të ditur se janë shpërndarë fletëvotimet dhe materialet e tjera të ndjeshme zgjedhore, përfshirë listat përfundimtare të votuesve dhe vulat.
Për këto zgjedhje janë shtypur gjithsej 1 milion e 778 mijë e 300 fletëvotime. Prej tyre, 1 milion e 605 mijë janë për votim të rregullt, 19 mijë e 450 për votim me kusht, 13 mijë e 500 janë fletëvotime rezervë, ndërsa 3 mijë e 500 janë destinuar për personat me nevoja të veçanta.
Në mbarë Kosovën janë hapur 949 qendra votimi me gjithsej 2.550 vendvotime, ku qytetarët po ushtrojnë të drejtën e tyre për të zgjedhur përfaqësuesit e rinj në Kuvendin e Kosovës.
