Luftën vet nuk e përjetoi.
Mirëpo, tregimet për gjyshin e rënë në majin e vitit 1999, i mësoi detajisht nga familja.
E kujtimet i përmblodhi në një libër, që autorja Rumejsa Dallku e titulloi “99-ta e gdhendur n’gjak”.
“Sot është 22 maji, dita kur para 27 vitesh është vrarë gjyshi im. Për dikë mund të jetë vetëm një datë në kalendarë, por për mua është dita kur një familjeje i është shkëputur zemra përgjysmë. Ku një shtëpi mbeti pa zërin e burrit të saj dhe ku një tryezë mbeti me një vend bosh. Sa herë përmend gjyshin tim nuk e përmendi vetëm si familjar, e përmendi si një njëri qa dha jetën pa kërkuar lavdi e as emër”, tha Rumejsa Dallku -autore.
Libri u promovua në përvjetorin e masakrës në të cilën u vranë të paktën 68 civilë shqiptarë.
Që të gjithë civilët u ekzekutuan dhe u masakruan në oborrin e shtëpisë së Kahriman Pasomës.
“Sot po promovojmë edhe librin “99-ta e gdhendur n’gjak” një vepër që vjen si dëshmi, kujtesë dhe thirrje që histori të mos harrohet. Librat si ky nuk janë vetëm rrëfime janë amanet për brezat që vijnë që ta njohin të vërtetën dhe të ruajnë me krenari kujtesën tonë kolektive”, tha Medina Bunjaku – drejtoresha për Kulturë, Rini dhe Sport.
E profesori Myrteza Dallku, kishte një thirrje për të rinjtë.
“Brezave të rinj u bëjë thirrje që të mos e harrojnë të kaluarën, por të njohin atë me të vërtetën dhe dinjitetin që meriton. Në mënyrë që sakrifica e martirëve të mos harrohet dhe ngjarjet e tilla tragjike të mos përsëriten më kurrë”, u shpreh ai.
Në fund të ceremonisë, të pranishmëve, autorja u dhuroi edhe nga një libër si kujtim.
