Zvicra nuk do t’i kërkojë Italisë rimbursimin e 1.5 milionë frangave për trajtimin mjekësor të 12 viktimave italiane të zjarrit tragjik në Crans-Montana. Vendimi u mor nga Këshilli Federal pas kërkesës së autoriteteve italiane.

Këshilli Federal i Zvicrës ka vendosur të mbulojë vetë shpenzimet e trajtimit mjekësor të 12 shtetasve italianë, të cilët u plagosën në zjarrin tragjik në Crans-Montana më 1 janar 2026 dhe morën trajtim në spitalet zvicerane.

Sipas njoftimit zyrtar, shpenzimet arrijnë në rreth 1.5 milionë franga zvicerane. Vendimi u mor pas propozimit të Italisë dhe diskutimeve mes dy vendeve, duke përjashtuar në mënyrë të jashtëzakonshme detyrimin e Romës për të rimbursuar këto kosto.

Në kushte normale, marrëveshja për lëvizjen e lirë ndërmjet Zvicrës dhe Bashkimit Evropian përcakton se secili shtet mbulon shpenzimet shëndetësore të qytetarëve të siguruar në sistemin e tij, edhe kur ata marrin trajtim mjekësor në një shtet tjetër.

Megjithatë, marrëveshja parashikon mundësinë që shtetet të bëjnë përjashtime nga ky rregull. Këtë mundësi e ka shfrytëzuar Këshilli Federal, duke vendosur që Zvicra të marrë përsipër të gjitha shpenzimet për rastin në fjalë.

Presidenti i Zvicrës, Guy Parmelin, e ka njoftuar personalisht kryeministren italiane, Giorgia Meloni, për vendimin.

Pas zjarrit të 1 janarit 2026 në Crans-Montana, 12 persona të siguruar në Itali u trajtuan fillimisht në spitalet zvicerane, përpara se të transferoheshin në spitale në Itali.

Ndërkohë, edhe një person i lënduar, i siguruar në sistemin shëndetësor zviceran, mori trajtim mjekësor në Itali.