Sipas agjencisë së lajmeve Reuters, këto zgjedhje përbëjnë sfidën më të madhe për pushtetin e Vuçiqit në më shumë se një dekadë.

Votimet po mbahen pas muajsh të tërë protestash masive të udhëhequra nga studentët, të cilët kërkojnë luftimin e korrupsionit, përgjegjësi institucionale dhe ndryshime politike në vend.

Protestat nisën pas tragjedisë në stacionin hekurudhor në Novi Sad, në vitin 2024, ku humbën jetën 16 persona. Që atëherë, lëvizja studentore ka fituar mbështetje të gjerë në mesin e qytetarëve.

Megjithatë, gara zgjedhore pritet të jetë e ngushtë. Sondazhet e cituara nga Reuters japin rezultate të ndryshme, me partinë e Vuçiqit në avantazh në disa prej tyre, ndërsa të tjera favorizojnë kandidatët e mbështetur nga studentët.

Përveç luftimit të korrupsionit dhe përmirësimit të arsimit, studentët synojnë ndryshimin e sistemit politik. Në anën tjetër, Vuçiqi mbështetet te premtimet për rritjen e pagave dhe pensioneve, investimet në infrastrukturë dhe vazhdimin e zhvillimit ekonomik.

Rezultati i zgjedhjeve pritet të ketë ndikim të rëndësishëm në të ardhmen politike të Serbisë, si dhe në marrëdhëniet e saj me Bashkimin Evropian.

Reuters vëren se, pavarësisht pakënaqësive dhe protestave të vazhdueshme, Vuçiqi mbetet një figurë me ndikim të madh politik, ndërsa lëvizja studentore përbën sfidën më serioze ndaj pushtetit të tij në vitet e fundit.

Burimi: RTKLive