Presidenti amerikan, Donald Trump, ka deklaruar se Shtetet e Bashkuara synojnë të zhvillojnë marrëdhënie tregtare si me Ukrainën, ashtu edhe me Rusinë, pasi të përfundojë lufta mes dy vendeve.
“Sigurisht që do të bëjmë biznes me Ukrainën dhe Rusinë pasi të përfundojë kjo luftë, besoj”, tha Trump, duke iu përgjigjur një pyetjeje të gazetarëve, transmeton Telegrafi.
Gjatë komunikimit me mediat ishte e pranishme edhe zonja e parë e SHBA-së, Melania Trump. Kur gazetarët e pyetën nëse planifikojnë të vizitojnë Ukrainën, ajo u përgjigj: “Do ta shohim”. Trump shtoi menjëherë se një vizitë e tillë mund të realizohet.
Gazetarët e pyetën presidentin amerikan edhe nëse kishte biseduar me miliarderin Elon Musk për situatën në Ukrainë, me gjasë duke iu referuar shërbimit satelitor Starlink. Trump konfirmoi se kishte zhvilluar një bisedë me të, por nuk pranoi të jepte detaje.
Një ditë më parë, Trump kishte shprehur shpresën se lufta në Ukrainë po i afrohej fundit. Ai kishte sugjeruar gjithashtu se SHBA-ja mund të vendosë tarifa ndaj të dyja palëve, Ukrainës dhe Rusisë, nëse ato nuk arrijnë një marrëveshje paqeje.
Ndërkohë, mediat kanë raportuar se presidenti ukrainas, Volodymyr Zelensky, ka njoftuar për një takim trepalësh mes Ukrainës, SHBA-së dhe Rusisë, që synon diskutimin e mënyrave për t’i dhënë fund luftës gjatë gjysmës së parë të nëntorit.
Kremlini ka konfirmuar gjithashtu se takimi do të mbahet, ndërsa raportimet kanë përmendur Abu Dhabin ose Zvicrën si vende të mundshme për zhvillimin e tij.
Në lidhje me Starlink-un, Ukraina riktheu shpejtësitë e terminaleve satelitore më 24 tetor. Më vonë po atë ditë, Musk deklaroi se kundërshton përdorimin e shërbimit të tij për operacione ushtarake sulmuese dhe pretendoi se Forcat e Armatosura të Ukrainës e kishin shkelur këtë kusht.
Megjithatë, këshilltari i Zelenskyyt, Serhii “Flash” Beskrestnov, e kundërshtoi pretendimin, duke shpjeguar funksionimin e kufizimeve dhe arsyet pse Ukraina nuk mund ta përdorë Starlink-un për operacione gjatë goditjeve ushtarake. /Telegrafi/
