Aktori i njohur Sylvester Stallone nuk e mohon se fama dhe pozita e tij në Hollywood u kanë dhënë përparësi fëmijëve të tij, duke theksuar se është detyrë e prindërve t’u krijojnë atyre sa më shumë mundësi.
Në një intervistë për USA Today, Stallone ka thënë se nuk e shqetëson nëse ndihma që u ofron fëmijëve të tij cilësohet si nepotizëm, pasi, sipas tij, prindërit duhet të bëjnë gjithçka për t’i mbështetur ata.
“Në fillim thonë: ‘Nepotizmi është i tmerrshëm’. Unë them: ‘Të lutem, nuk je prind i mirë nëse nuk ke bërë ndonjëherë diçka për t’i ndihmuar fëmijët e tu. Përndryshe, duket sikur nuk të interesojnë, sepse fëmijët vijnë të parët’”, është shprehur aktori.
Deklaratat e tij vijnë në kohën kur vajza e tij 24-vjeçare, Scarlet Rose Stallone, është pjesë e serialit “Tulsa King”, ku luan rolin e një punonjëseje në stallë. Personazhi i saj pritet të ketë më shumë hapësirë në sezonin e katërt të serialit.
Stallone ka pranuar se mbiemri i tij mund t’ua hapë dyert fëmijëve më shpejt se të tjerëve, por ka theksuar se për të qëndruar në industrinë e filmit nevojitet talent.
“Nëse mund t’ua hapim derën, pastaj shohim nëse kanë aftësinë të kalojnë përmes saj. Njerëzit mund të thonë se ajo e mori rolin shumë lehtë. Ndoshta kanë të drejtë. Por për të qëndruar në atë nivel dhe për të qenë para miliona njerëzve, ose e ke talentin, ose nuk e ke”, ka thënë ai.
Ndërkohë, Stallone rikthehet në sezonin e katërt të “Tulsa King” në rolin e Dwight “The General” Manfredit, një bos mafioz që drejton një perandori kriminale në qytetin e Tulsës.
Në një intervistë për Entertainment Weekly, aktori ka treguar se i pëlqen ky personazh, pasi është ndryshe nga disa figura të tjera të botës së krimit.
Sa u përket skenave të dhunshme, Stallone ka thënë se preferon që ato të jenë sa më të fuqishme dhe tronditëse.
“Kur ndodh dhuna, nuk dua që gjithçka të përfundojë me një të shtënë dhe ai i keqi të zhduket. Dua që skena të jetë një festival tmerri, që publiku të thotë: ‘Uau, ai e mori atë që meritonte’”, ka deklaruar aktori.
Sinjali – aty ku e vërteta flet para lajmit!
Burimi: Sinjali
