Juventusi ka nisur të shqyrtojë mundësitë për përforcimin e repartit ofensiv gjatë afatit kalimtar të janarit, ndërsa në mesin e emrave të pëlqyer nga trajneri Luciano Spalletti është edhe sulmuesi amerikan Folarin Balogun.

Sulmuesi 25-vjeçar i Monacos është njëri prej kandidatëve për t’iu bashkuar gjigantit italian në janar të vitit 2027. Balogun vlerësohet nga klubi francez rreth 40 deri në 50 milionë euro, ndërsa Juventusi ende nuk ka paraqitur ndonjë ofertë zyrtare, por po e përcjell nga afër situatën e tij.

Trajneri Spalletti kërkon më shumë alternativa në sulm, pasi Juventusi nuk ka pasur efikasitetin e pritur në këtë repart. Pas 10 xhirove në Serie A, bardhezinjtë renditen në vendin e shtatë me 17 pikë dhe kanë realizuar vetëm 13 gola.

As Randal Kolo Muani dhe as Nick Woltemade nuk kanë arritur të ofrojnë vazhdimësinë e pritur, prandaj drejtuesit e klubit po shqyrtojnë mundësinë e transferimit të një sulmuesi me karakteristika të ndryshme.

Balogun shihet si një alternativë që mund t’i përshtatet kërkesave të trajnerit italian, falë shpejtësisë, lëvizjeve pa top dhe aftësisë për të sulmuar hapësirat. Amerikani iu bashkua Monacos në vitin 2023 nga Arsenali, pasi kishte realizuar 21 gola gjatë huazimit te Stade de Reims.

Megjithatë, transferimi i tij nuk pritet të jetë i lehtë, pasi Monaco kërkon deri në 50 milionë euro për kartonin e sulmuesit, i cili ka kontratë me klubin francez deri në qershor të vitit 2028.

Në rast se dështon marrëveshja për Balogun, Juventusi ka edhe alternativa të tjera në listën e tij, përfshirë Brian Brobbey të Sunderlandit dhe Younes Ebnoutalib të Eintracht Frankfurtit.

Drejtuesit e klubit italian pritet t’i vlerësojnë të gjitha mundësitë gjatë javëve të ardhshme, përpara se të vendosin për një ofertë konkrete në afatin kalimtar të janarit. /Telegrafi/