Një ngjarje skandaloze është shënuar në Bruksel, në prag të edicionit të dytë të Forumit të Zgjerimit të Bashkimit Evropian (EU Enlargement Forum 2026), organizuar nga Komisioni Evropian nën udhëheqjen e komisionares për Zgjerim, Marta Kos.

Përderisa Kosova nuk ka pasur fare përfaqësues në këtë aktivitet të dedikuar afrimit të vendeve të rajonit me BE-në, në mbrëmjen hapëse dhe koncertin e mbajtur më 15 nëntor – një ditë para ngjarjes kryesore – në skenë është interpretuar kënga patriotike serbe “Oj Kosovo, Kosovo”, e njohur për pretendimet historike, politike dhe nacionaliste serbe mbi Kosovën.

Sipas programit zyrtar, në mbrëmjen kulturore morën pjesë Orkestra e të Rinjve të Ballkanit Perëndimor (Western Balkan Youth Orchestra) dhe grupi muzikor slloven “Kapobanda”, ku pikërisht ky i fundit e interpretoi këngën kontroverse.

Çfarë përmban kënga “Oj Kosovo, Kosovo”?

Kënga, e cila nis me vargun “Sa Kosova zora sviće” (Nga Kosova zbardh agimi), është shkruar në vitin 1989 nga kompozitori serb Ljubomir Ljuba Manasijeviq – në kohën e shënimit të 600-vjetorit të Betejës së Kosovës – dhe u regjistrua në vitin 1990, duke u shndërruar në simbol të diskursit nacionalist serb.

Në tekstin e saj përmenden Graçanica, Vidovdani, princi Lazar dhe Millosh Obiliqi, ndërsa mesazhi politik bëhet i drejtpërdrejtë në vargjet ku pretendohet se Kosova është tokë serbe dhe se nuk do ta dorëzojnë. Një version i kësaj kënge ishte publikuar edhe më 27 qershor 2022 nga këngëtarja serbe Danica Cërnogorçeviq, e shoqëruar me një mesazh të mitropolitit Amfilohije, ku Kosova cilësohej si “zemra e zemrës” së popullit serb.

Kontrasti me agjendën evropiane të Forumit

Forumi i Zgjerimit të BE-së, i cili vazhdon më 16 nëntor me fjalimet e presidentes së Komisionit Evropian, Ursula von der Leyen, presidentit të Finlandës, Alexander Stubb, dhe komisionares Marta Kos, ka për qëllim diskutimin e reformave, sigurisë dhe bashkëpunimit rajonal.

Megjithatë, lejimi i një kënge me ngarkesë të tillë nacionaliste në një ngjarje zyrtare evropiane, në mungesë totale të përfaqësuesve të Kosovës, ngre pikëpyetje serioze mbi ndjeshmërinë politike të organizatorëve në Bruksel.

Burimi: Sinjali