Çdo gjë është e re brenda dhe jashtë kësaj shkolle.

U rinovua vitet e fundit që t’u shërbejë të vegjëlve të lagjes Podaj në Koliq, por në këtë shtator nuk pati mjaftueshëm nxënës që të fillonte viti shkollor.

11 nxënësit e saj u bartën në shkollën amë “Tefik Qanga”, brenda të njëjtit fshat.

“E kanë rrit numrin e nxënësve këtu, tash janë diku rreth 30 nxënës. Është një e mirë që tash këtu klasat nuk janë të kombinume, janë të ndara dhe mësimi zhvillohet pak më mirë”, deklaroi Naim Sheqiri – arsimtar.

Edhe me këtë transferim, asnjë klasë e shkollës nuk arrin t’i ketë dhjetë nxënës.

Mësimdhënësit kërkojnë nga Komuna e Prishtinës që të gjejë forma të veçanta për ta mbajtur shkollën hapur.

“Kjo shkollë është shpresa e fshatit Koliq, sepse këtu e kemi edhe ambulancën dhe zyrën e gjendjes civile, e po shpresoj që kjo shkollë edhe disa vite nuk mbyllet”, theksoi tutje arsimtari Naim Sheqiri.

Ndërkohë, nga Drejtoria për Arsim e Komunës së Prishtinës thonë se objektet e boshatisura do të shfrytëzohen për nevoja të tjera të komunitetit.

“Konkretisht bëhet fjalë për tri objekte, të cilat nuk do të shërbejnë si shkolla, por do t’i rimodifikojmë për diçka tjetër, për atë se çka ka nevojë fshati”, deklaroi Arianit Elshani – drejtor për Arsim në Komunën e Prishtinës.

Fshati Koliq është vetëm 25 km larg Prishtinës. Infrastruktura rrugore është e rregulluar dhe ka edhe transport publik, por aktualisht këtu jetojnë rreth 250 banorë. 

Burimi: RTKLive