Mish viçi i pjekur në skarë, qepë të karamelizuara, speca dhe salca aromatike Mojo Rojo krijojnë një sanduiç plot shije, sipas recetës së kuzhinierit të famshëm.
Sanduiçi portorikan me biftek është një nga recetat që Gordon Ramsay prezanton në serinë e tij Ramsay Around the World. Ai kombinon mishin e viçit të pjekur në skarë me perime të karamelizuara dhe një salcë pikante, të pasur me aroma.
E veçanta qëndron te salca Mojo Rojo, e përgatitur me domate, speca, hudhër, vaj ulliri dhe lëng limoni, e cila përdoret edhe gjatë pjekjes së mishit, transmeton Telegrafi.
Përbërësit
Për salcën Mojo Rojo:
- ½ qepë e verdhë, e grirë
- 1 thelb hudhre, i shtypur
- 1 filxhan domate qershi
- 1 spec i pjekur, i pastruar nga farat dhe i prerë
- 1 spec i vogël djegës, pa fara, i grirë imët
- ½ filxhani lëng perimesh (rreth 120 ml)
- kripë, sipas shijes
- lëngu i 1 limoni
- ¼ filxhani vaj ulliri ekstra i virgjër (rreth 60 ml)
Për sandviçin:
- 1 biftek viçi, me shtresën e jashtme të yndyrës të hequr
- kripë
- piper i zi i bluar në çast
- vaj ulliri
- 1 qepë e bardhë, e prerë në feta
- 1 spec i kuq, i prerë në shirita
- 1 bukë e butë për sanduiç, rreth 15–20 cm e gjatë, e prerë përgjysmë për së gjati
- ⅓ filxhani koriandër i freskët, i grirë
- 4 qepë të njoma, vetëm pjesët e gjelbra, të prera imët
Përgatitja
1. Përgatitja e salcës Mojo Rojo
Ngrohni një tigan në temperaturë mesatare deri të lartë dhe shtoni 1–2 lugë gjelle vaj ulliri.
Hidhni qepën e grirë, pak kripë dhe kaurdiseni derisa të bëhet e tejdukshme.
Shtoni domatet qershi dhe hudhrën. Gatuajini derisa domatet të fillojnë të zbuten dhe të çahen.
Shtoni specin e pjekur dhe specin djegës. Vazhdoni gatimin edhe rreth pesë minuta.
2. Përfundimi i salcës
Hidhni lëngun e perimeve dhe vazhdoni gatimin për 7–10 minuta, derisa lëngu të reduktohet pak.
Hiqeni tiganin nga zjarri dhe kalojeni përzierjen në blender. Përpunojeni derisa të përftoni një masë të njëtrajtshme, duke shtuar gradualisht pjesën e mbetur të vajit të ullirit.
Rregullojeni shijen me kripë dhe lëng limoni. Lëreni salcën mënjanë.
3. Përgatitja e biftekut
Ngrohni skarën ose tiganin për skarë në temperaturë të lartë. Njëkohësisht, ngrohni edhe një tigan që nuk ngjit.
Spërkateni biftekun me kripë dhe piper të zi, lyejeni me vaj ulliri dhe shtypeni lehtë me duar për t’ia përshtatur formën madhësisë së bukës.
Vendoseni në pjesën më të nxehtë të skarës.
4. Karamelizimi i perimeve
Në tiganin tjetër shtoni një lugë gjelle vaj ulliri dhe qepën e prerë në feta.
Kaurdiseni për pak kohë, pastaj shtoni specin e kuq dhe pak vaj ulliri, nëse nevojitet.
Vazhdoni gatimin derisa perimet të zbuten dhe të karamelizohen.
5. Lyerja e biftekut me salcë
Kur bifteku të jetë skuqur mirë nga njëra anë, kthejeni dhe lyeni sipërfaqen e pjekur me një shtresë të bollshme salce Mojo Rojo.
Gatuajeni edhe 30–60 sekonda, pastaj kthejeni përsëri dhe lyeni edhe anën tjetër.
6. Pjekja e bukës
Spërkatni me vaj ulliri pjesët e brendshme të bukës dhe shtoni pak kripë.
Fërkojini lehtë dy gjysmat me njëra-tjetrën, pastaj vendosini në skarë me pjesën e prerë poshtë.
Piqini derisa të krijohet një sipërfaqe krokante dhe e artë.
Hiqeni edhe biftekun nga skara kur të ketë arritur shkallën e dëshiruar të pjekjes. Ramsay rekomandon mishin pak të pjekur në brendësi.
7. Përfundimi i mbushjes
Kur qepët dhe specat të jenë karamelizuar, hiqini nga zjarri.
Shtoni koriandrën e freskët dhe pjesët e gjelbra të qepëve të njoma. Përziejini lehtë.
8. Përgatitja përfundimtare
Në gjysmën e poshtme të bukës vendosni disa lugë të bollshme nga përzierja e qepëve dhe specave.
Lëreni biftekun të pushojë pak, pastaj priteni në feta të trasha, diagonalisht dhe në drejtim të kundërt me fijet e mishit.
Vendosini fetat mbi perimet, duke i lënë të dalin pak përtej skajeve të bukës.
Shtoni kripë dhe piper sipas dëshirës, mbulojeni me gjysmën tjetër të bukës dhe priteni sandviçin përgjysmë.
Rezultati është një sandviç me bukë krokante, biftek të lëngshëm, perime të karamelizuara dhe salcë pikante, ku ndërthuren aromat e kuzhinës portorikane. /Telegrafi/
