Neymari përballet me masa disiplinore në Brazil, pasi është dërguar para Gjykatës së Lartë të Drejtësisë Sportive (STJD) për shkeljen e të ashtuquajturit “rregulli Vinicius Junior”.

Sulmuesi i Santosit do të paraqitet para organit disiplinor të mërkurën, më 28 tetor, për të dhënë llogari lidhur me incidentin e ndodhur në ndeshjen e së shtunës ndaj Bahias, në kuadër të kampionatit brazilian.

Ngjarja ndodhi gjatë pushimit mes dy pjesëve, kur Neymari u përfshi në një debat me Rodrigo Nestor.

Gjatë përplasjes, braziliani mbuloi gojën me dorë, ndërsa pas shqyrtimit të pamjeve përmes sistemit VAR, gjyqtari Savio Pereira Sampaio e ndëshkoi me karton të kuq.

Prokuroria e ka akuzuar futbollistin në bazë të nenit 191, i cili parasheh gjobë nga 100 deri në 100 mijë realë brazilianë për mosrespektimin e rregulloreve të një organizate sportive.

Përveç kësaj, prokuroria ka kërkuar që ndaj tij të zbatohet edhe neni 258 i kodit disiplinor, që lidhet me shkeljet e disiplinës dhe etikës sportive.

Ky nen parasheh pezullim nga një deri në gjashtë ndeshje.

Problemet e Neymarit nuk përfundojnë këtu. Ai do ta humbasë edhe ndeshjen e ardhshme të Santosit kundër Bragantinos, që zhvillohet të hënën, pasi ndaj Bahias mori kartonin e tretë të verdhë në kampionat./Telegrafi/