Dy komisione parlamentare do të zhvillojnë mbledhje këtë të premte në Kuvendin e Kosovës, ku në fokus do të jenë hetimet për rastin e vrasjes së Arlinda Zekajt dhe çështjet e sigurisë dhe mbrojtjes.
Komisioni Hetimor Parlamentar për veprimet dhe mosveprimet institucionale lidhur me vrasjen e Arlinda Zekajt, si dhe trajtimin e dhunës ndaj fëmijëve dhe grave në familje, do të intervistojë disa zyrtarë institucionalë.

Mbledhja e këtij komisioni do të nisë në orën 09:00. Para anëtarëve të tij do të intervistohen Albulena Mujaj-Bajraktaraj, drejtoreshë e Drejtorisë për Mirëqenie Sociale në Komunën e Pejës, Samka Drançolli, zyrtare për Barazi Gjinore në këtë komunë, si dhe Blerim Shabani, drejtor i departamentit në Ministrinë për Punë, Familje dhe Vlerat e Luftës Çlirimtare.
Ndërkaq, në orën 10:00 do të mbahet edhe mbledhja e Komisionit për Çështje të Sigurisë dhe Mbrojtjes, i cili do të zhvillojë një takim me Komitetin për Mbrojtje dhe Siguri të Odës Ekonomike Amerikane.
Të dyja mbledhjet do të zhvillohen në ambientet e Kuvendit të Kosovës.
Burimi: Insajderi





