Një valë e re sulmesh ruse me dronë dhe raketa balistike ka goditur Ukrainën gjatë natës, duke shkaktuar dëme të mëdha në infrastrukturën energjetike, ndërprerje të energjisë elektrike dhe probleme në furnizimin me ujë e ngrohje.
Presidenti ukrainas, Volodymyr Zelensky, bëri të ditur se 12 rajone të vendit u vunë në shënjestër, ndërsa kryeqyteti, Kievi, u godit më së rëndi. Sipas tij, në sulme u përdorën mbi 170 dronë dhe më shumë se 30 raketa balistike, ndërsa nëntë persona u lënduan, përfshirë një fëmijë.
Në një reagim në Telegram, Zelensky akuzoi Moskën se po përgatitet për bisedimet e ardhshme duke sulmuar infrastrukturën kritike të Ukrainës. Delegacionet ukrainase dhe ruse pritet të marrin pjesë në bisedimet trepalëshe në Abu Dhabi javën e ardhshme.
Situata në Kiev mbetet e vështirë, pasi sulmet dëmtuan ndërtesa banimi, Urën e Veriut dhe një kopsht fëmijësh. Përveç kryeqytetit, dëme në nënstacione elektrike janë raportuar edhe në rajonet Vinnytsia, Zhytomyr, Rivne, Kharkiv dhe Dnipro.
Zelensky tha se në rajonin e Kievit janë goditur nënstacione që lidhin centralet bërthamore të Rivnes dhe Hmelnitskit me kryeqytetin dhe pjesën qendrore të vendit.
Ndërkohë, kryetari i Kievit, Vitali Klitschko, njoftoi se furnizimi me ujë në qytet është rikthyer në funksion normal, ndërsa rreth 60 për qind e ndërtesave të banimit janë rilidhur me sistemin e ngrohjes. Ministri i Energjisë, Denys Shmyhal, konfirmoi ndërprerje të energjisë elektrike në pesë rajone, pa bërë të ditur numrin e familjeve të prekura.
Sulmet e fundit vijnë në një kohë kur temperaturat në Ukrainë po bien dhe në disa pjesë të vendit kanë nisur reshjet e para të borës për këtë dimër.
Zhvillimet pasojnë edhe takimin e së enjtes në Shtëpinë e Bardhë, ku Zonja e Parë e SHBA-së, Melania Trump, priti delegacione ruse dhe ukrainase. Ajo bëri thirrje për një armëpushim më të qëndrueshëm, pas një ndërprerjeje të luftimeve në rajonin jugor të Khersonit.
Ndërkohë, gjatë një armëpushimi gjashtëditor, qindra banorë të qytetit të pushtuar ukrainas Oleshky arritën të evakuoheshin, pasi po përballeshin me uri dhe bombardime të vazhdueshme. Të dyja palët ia atribuuan presidentit amerikan, Donald Trump, ndërmjetësimin e kësaj marrëveshjeje.
Në fillim të kësaj jave, sulmet me bomba rrëshqitëse ndaj një qendre ndihme pranë Zaporizhzhias shkaktuan dhjetëra viktima. Numri i të vdekurve ka arritur në 55, ndërsa ekipet e kërkim-shpëtimit po vazhdojnë punën në rrënoja.
Pas sulmeve të fundit, Zelensky tha se Ukraina pret mbështetje më të madhe nga Shtetet e Bashkuara, duke kërkuar unitet në çështjet e sigurisë, dënimin e agresionit rus dhe rritjen e presionit të sanksioneve ndaj presidentit rus, Vladimir Putin.
Ndërkaq, zëdhënësi i presidentit ukrainas nuk pranoi të komentojë raportimet se Zelensky mund të ftohet në Mbretërinë e Bashkuar për një vizitë shtetërore vitin e ardhshëm.
Sinjali – aty ku e vërteta flet para lajmit!
Burimi: Sinjali
