Dhjetëra protestues u përpoqën të hynin me forcë në ndërtesën e parlamentit çek gjatë një proteste natën e kaluar kundër ndryshimeve në financimin e mediave publike.

Ndërkohë, në një votim gjatë natës, koalicioni qeverisës siguroi miratimin e propozimit në fazën e parë të procesit parlamentar.

Qeveria e kryeministrit çek Andrej Babish, e mbështetur nga partia “Liria dhe Demokracia e Drejtpërdrejtë”, e ka kritikuar shpesh mënyrën se si mediat publike dhe private raportojnë mbi politikat e saj, duke akuzuar disa media për anshmëri.

Opozita ka krahasuar ndryshimet e propozuara me reformat e zbatuara në Hungari nën kryeministrin Viktor Orban, një periudhë gjatë së cilës pati një zgjerim të ndjeshëm të mediave pro-qeveritare.

Qeveria deklaroi se po heq tarifën mujore për shërbimin publik të transmetimit, e cila arrin në 205 korona (18,41 euro) për familje, me qëllim uljen e kostove për qytetarët. Në vend të kësaj, mediat publike do të financohen përmes buxhetit të shtetit.

Qindra protestues u mblodhën para parlamentit, ndërsa disa prej tyre qëndruan aty gjatë gjithë natës. Disa individë u përpoqën të hynin në ndërtesë, por nuk ia dolën.

Gazetarët dhe stafi tjetër në media kanë paralajmëruar grevë për datën 3 nëntor, ndërsa një grup qytetar ka bërë thirrje për një protestë publike të dielën.

Burimi: Dukagjini