Sipas njoftimit të Prokurorisë Speciale, aktakuza është dorëzuar në Gjykatën Themelore në Prishtinë për veprat penale “Kryerja e veprës terroriste” dhe “Veprat e rënda kundër rendit kushtetues dhe sigurisë së Republikës së Kosovës”.

Në njoftim thuhet se S.R., së bashku me të pandehurit e tjerë ndaj të cilëve ishte ngritur aktakuzë më 11 shtator 2024, dyshohet se ka marrë pjesë në sulmin ndaj zyrtarëve të Policisë së Kosovës, si pjesë e një grupi terrorist të strukturuar dhe të armatosur rëndë.

Si pasojë e sulmit në Banjskë, mbeti i vrarë rreshteri i Policisë së Kosovës, A.B., ndërsa një zyrtar policor u plagos dhe disa të tjerë u lënduan.

Sipas Prokurorisë Speciale, qëllimi i grupit ishte destabilizimi i strukturave themelore kushtetuese të Republikës së Kosovës dhe shkëputja e pjesës veriore të territorit të vendit, me synimin për t’ia bashkuar atë Republikës së Serbisë.

Aktakuza ndaj S.R. vjen si vazhdim i procedurës penale në rastin “Banjska”. Më 11 shtator 2024, Prokuroria Speciale kishte ngritur aktakuzë ndaj 45 të pandehurve për përfshirjen e dyshuar në këtë rast.

Sipas njoftimit zyrtar, ndaj të pandehurit S.R. është në fuqi masa e paraburgimit.

Burimi: RTKLive