Lojërat Mesdhetare “Prishtina 2030” do të shtrihen edhe në disa komuna të tjera të Kosovës, ashtu siç ishte paraparë që në fazën e kandidaturës. Kështu ka bërë të ditur kryeministri i Kosovës, Albin Kurti, pas takimit të radhës të Komitetit Organizativ të Lojërave Mesdhetare (KOLM), ku u diskutuan përgatitjet dhe projektet prioritare për organizimin e këtij eventi të madh sportiv.

Sipas Kurtit, në takim është riafirmuar se Lojërat do ta ruajnë shtrirjen e përcaktuar në Librin e Kandidaturës, ku përveç Prishtinës janë përfshirë edhe Peja, Gjakova, Prizreni, Drenasi, Skenderaj dhe komuna të tjera.

Ky koncept ishte pjesë e propozimit të Kosovës që nga aplikimi dhe, sipas kryeministrit, pikërisht me këtë plan vendi fitoi të drejtën për organizimin e Lojërave Mesdhetare të vitit 2030.

Shtrirja e garave nëpër komuna dhe shfrytëzimi i objekteve sportive do të pasqyrohen në rishikimin e draftit të Masterplanit, i cili ende është në shqyrtim. Në këtë planifikim do të përfshihen edhe investimet që tashmë janë duke u realizuar në Qendrën Nacionale të Xhudos në Pejë, palestrën “Sezai Surroi” në Prizren dhe palestrën “Shani Nushi” në Gjakovë.

Në fokus të takimit ishin edhe projektet prioritare, për të cilat u theksua nevoja që puna të vazhdojë me ritëm të shtuar. Ndër to janë Qendra e Studentëve, e cila pritet të shërbejë si Fshat i Atletëve, Pallati i Rinisë dhe Sporteve në Prishtinë, Qendra Akuatike dhe Qendra Nacionale e Tenisit.

Po ashtu, u ritheksua rëndësia e Stadiumit Nacional si projekt shtetëror për zhvillimin e sportit në Kosovë.

Sa i përket ceremonive të hapjes dhe mbylljes, në takim u shqyrtua edhe mundësia e shfrytëzimit të stadiumit “Fadil Vokrri”, me kapacitet të shtuar. Për këtë çështje do të vlerësohen kërkesat organizative dhe afatet e nevojshme për përgatitjen e stadiumit.

Një tjetër vendim i takimit ishte që Komiteti Organizativ të paraqitet me një qëndrim të përbashkët në takimin e ardhshëm me Komitetin Ndërkombëtar të Lojërave Mesdhetare, ku do të prezantohen hapat e mëtejmë në përgatitjet për edicionin e vitit 2030.

Anëtarët e KOLM-it shprehën përkushtimin për organizimin e suksesshëm të Lojërave, të cilat synohet të shërbejnë jo vetëm si një ngjarje e rëndësishme sportive, por edhe si mundësi për zhvillimin e infrastrukturës dhe promovimin ndërkombëtar të Kosovës./Telegrafi/