Bashkimi Evropian do të fillojë të aplikojë një tarifë prej 2 euro për trajtimin e të gjitha pakove që hyjnë në tregun e BE-së, duke filluar nga e diela, ndërsa importet e lira nga Kina vazhdojnë të rriten ndjeshëm.

Një taksë prej 3 € ka hyrë tashmë në fuqi në korrik për pakot e vogla me vlerë më pak se 150 €.

Megjithatë, kjo tarifë është e përkohshme dhe do të mbetet në fuqi deri në vitin 2028, kur të bëhet funksional një sistem i ri doganor i bazuar në teknologjinë e informacionit.

Masat e reja u konsideruan të nevojshme pasi BE-ja përballet me një rritje dramatike të importeve me kosto të ulët nga platformat kineze, si Temu, Shein dhe AliExpress.

Tarifa e re prej 2 €, e cila hyn në fuqi më 1 nëntor, do të zbatohet për të gjitha pakot, pavarësisht vlerës së tyre, dhe do të mbulojë kostot e trajtimit doganor. Ajo shtohet mbi taksën ekzistuese prej 3 €.

“Logjika pas kësaj takse është krijimi i kushteve të barabarta: të gjitha mallrat që hyjnë në BE duhet të paguajnë shumën e duhur dhe të justifikuar të taksës”, deklaroi një zyrtar i BE-së.

Ai shtoi: “Qëllimi i tarifës është të mbulojë kostot e kontrollit, pasi tregtia elektronike sjell një kosto joproporcionale për autoritetet tona doganore”.

Tarifa e re do të paguhet nga platformat, shitësit ose transportuesit dhe do të mblidhet nga 27 shtetet anëtare të BE-së.

Nga shuma e mbledhur, 75% do të shkojë në buxhetin e BE-së, ndërsa 25% do të mbetet në dispozicion të vendeve anëtare.

Taksa prej 3 €, e vendosur në korrik, ka pasur tashmë ndikim në vëllimin e importeve: sipas Komisionit Evropian, midis korrikut dhe shtatorit, numri i pakove të vogla që hyjnë në bllok ka rënë me 60%.

Megjithatë, çdo ditë në tregun e BE-së hyjnë ende 5 milionë pako, bëri të ditur gjithashtu ekzekutivi i BE-së.

Në vitin 2024, 91% e këtyre dërgesave vinin nga Kina, duke krijuar një konkurrencë të ashpër për shitësit me pakicë evropianë.

Një problem tjetër është shkelja e rregullave të BE-së lidhur me produktet.

Në shtator, Komisioni propozoi një legjislacion për të luftuar importet e produkteve të paligjshme – veçanërisht ato që shiten përmes tregjeve online – duke siguruar që një operator ekonomik brenda BE-së të jetë gjithmonë ligjërisht përgjegjës në rast të mosrespektimit të rregullave.

Në maj, Komisioni e gjobiti gjithashtu Temu-n me 200 milionë euro për mangësi që lidhen me lodra të rrezikshme për fëmijë dhe karikues me defekte.

Brukseli po heton edhe Shein-in lidhur me produkte të paligjshme, përfshirë kukulla seksi që ngjajnë me fëmijë. /Telegrafi/