Një rast vjedhjeje në Prizren ka çuar Policinë në shtëpinë e një 22-vjeçari, ku gjatë kontrollit janë gjetur jo vetëm sende të vjedhura, por edhe substancë e dyshuar narkotike. Zbulimi ka bërë që ndaj të riut të nisin hetime edhe për posedim të paautorizuar të drogës, mëson Gazeta Sinjali.
Ngjarja ka ndodhur të hënën, më 9 nëntor, rreth orës 10:00, në rrugën “Fadil Balaj” në Prizren.
Sipas informacioneve që ka siguruar Sinjali, i dyshuari është Trimlind Ymeri (22), në shtëpinë e të cilit kanë shkuar zyrtarët policorë pas pranimit të informacioneve që e lidhnin me një rast vjedhjeje.
Gjatë kontrollit, policët kanë gjetur sende të raportuara si të vjedhura, ndërsa kanë zbuluar edhe një sasi të substancës së dyshuar narkotike të llojit marihuanë.
Substanca e gjetur ka rezultuar të peshojë 3.49 gramë dhe është sekuestruar si provë materiale.
Pas zbulimit të narkotikut, në vendngjarje janë angazhuar edhe hetuesit e Drejtorisë për Hetimin e Trafikimit me Narkotikë, të cilët kanë marrë përsipër trajtimin e kësaj pjese të rastit.
Për ngjarjen është njoftuar Prokuroria, e cila ka udhëzuar që, pas intervistimit, ndaj 22-vjeçarit të vazhdojnë hetimet në procedurë të rregullt për veprën penale “Posedim i paautorizuar i narkotikëve, substancave psikotrope dhe analoge”.
Shënim: Personat e përmendur në këtë lajm konsiderohen të pafajshëm derisa fajësia e tyre të vërtetohet me vendim të formës së prerë të gjykatës.
Sinjali – aty ku e vërteta flet para lajmit!
Burimi: Sinjali
