Drejtoria Rajonale e Policisë në Prishtinë ka vazhduar me aksione të ngjeshura në terren gjatë javës që lamë pas, me synim rritjen e sigurisë publike dhe zbatimin e ligjit në të gjithë rajonin.
Në kuadër të këtyre kontrolleve të rrepta, zyrtarët policorë kanë arritur të realizojnë gjithsej 157 urdhëresa të lëshuara nga gjykatat kompetente. Nga këto, 27 urdhëresa ndërlidheshin drejtpërdrejt me vepra të ndryshme penale, ndërsa pjesa tjetër kishte të bënte me kundërvajtje, seanca gjyqësore dhe verifikime personash.
Pas përfundimit të procedurave të nevojshme policore, personat e dënuar me burgim efektiv janë dërguar menjëherë në qendrat përkatëse për vuajtje të dënimit. Ndërkaq, ata që ishin të dënuar me gjobë janë liruar vetëm pasi kanë shlyer të gjitha obligimet financiare të caktuara me urdhëresë.
Planifikimi operativ i policisë nuk u ndal me aq. Gjatë javës u godit edhe posedimi i paligjshëm i armëve, me ç’rast zyrtarët policorë sekuestruan 11 armë zjarri në lokacione të ndryshme.
Aksione të rrepta pati edhe në trafikun rrugor. Burimet e Sinjalit bëjnë me dije se policia ka shqiptuar 4.167 masa administrative me gjobë për shkelësit e rregullave të komunikacionit. Në këtë bilanc, një rol të rëndësishëm luajti edhe teknologjia e re: 71 nga këto gjoba u evidentuan direkt nga veturat inteligjente dhe ato me radar mobil.
Policia e Rajonit të Prishtinës bën të ditur se kontrollet e tilla do të vazhdojnë me intensitet të lartë edhe në ditët në vijim, për të garantuar rendin dhe sigurinë për të gjithë qytetarët.
Sinjali – aty ku e vërteta flet para lajmit!
Burimi: Sinjali
