Greva e korrierëve të kompanisë së shpërndarjes së ushqimit Just Eat në Cyrih ka nxjerrë në pah pakënaqësinë e punëtorëve ndaj ndryshimeve të planifikuara në kushtet e punësimit, ndërsa rreth 500 korrierë rrezikojnë të humbin vendet e tyre të punës.

Në një intervistë për gazetën zvicerane Blick, njëri prej korrierëve, i identifikuar me emrin Jan F., ka treguar arsyet që e shtynë t’i bashkohet grevës.

Ai punon prej tre vjetësh në shpërndarjen e ushqimit në rajonin e Glattalit dhe kundërshton vendimin që punëtorët e punësuar drejtpërdrejt të zëvendësohen me korrierë të pavarur.

“Ne nuk pranojmë që vendet e drejtpërdrejta të punës të zhduken dhe që pasojat e këtij vendimi t’i bartim vetëm ne”, ka deklaruar ai për Blick.

Të dielën, rreth gjysma e korrierëve të planifikuar për punë në Cyrih dhe Glattal refuzuan të kryenin porositë që u caktoheshin përmes aplikacionit. Ata u mblodhën para një filiali të McDonald’s në zonën Stauffacher të Cyrihut, ku protestuan kundër modelit të ri të punësimit. Greva nisi në orën 11:00 dhe ishte paraparë të vazhdonte deri në orën 22:00.

Korrierët kërkojnë që kompania të ulet në bisedime me punëtorët dhe sindikatën Syndicom. Sipas Jan F., kërkesat e tyre janë paraqitur tashmë dhe ata vazhdojnë të jenë të gatshëm për dialog.

Nga ana tjetër, një përfaqësues i sindikatës ka deklaruar për Blick se deri të dielën në mbrëmje nuk kishin marrë asnjë reagim nga Just Eat lidhur me kërkesat e punëtorëve.

Konflikti lidhet me vendimin e kompanisë për të ndryshuar modelin e saj të biznesit nga viti i ardhshëm. Në vend të korrierëve me kontrata të rregullta pune, Just Eat planifikon të angazhojë më shumë korrierë të vetëpunësuar, të cilët do të paguhen për çdo porosi të realizuar.

Punëtorët kundërshtojnë këtë ndryshim, pasi druajnë se do të mbajnë vetë rreziqet financiare dhe do të kenë më pak siguri sociale. Just Eat, ndërkaq, e arsyeton vendimin me ndryshimin e kërkesave të klientëve dhe nevojën për më shumë fleksibilitet në oraret e shpërndarjes.

Sipas kompanisë, modeli i ri do t’i mundësojë përshtatjen më të mirë me kërkesat e tregut, ndërsa korrierët dhe sindikata kërkojnë që vendet ekzistuese të punës të ruhen dhe kushtet e tyre të mos përkeqësohen./Telegrafi/