Gjithçka nisi pasi Zyra e Kryeministrit dorëzoi raportet e Ministrisë së Punëve të Brendshme dhe Ministrisë së Drejtësisë një orë para fillimit të mbledhjes, pas kërkesave të përsëritura të komisionit. Deputeti i PDK-së, Eman Rrahmani, ngriti dyshime për autenticitetin e dokumenteve, duke pretenduar se raportet prej 22 faqesh nuk përmbanin asnjë nënshkrim të ministrave përkatës.
“Fillimisht më vjen mirë që Zyra e Kryeministrit paska dërguar tash, para një ore, dy raportet. Edhe pse unë besoj që është mashtrim. Është shqetësuese që angazhimi edhe i Zyrës së Kryeministrit, në vend që ta ndihmonte këtë komision, bëhet pengesë”, ka thënë Rrahmani.
Përplasjet vazhduan edhe për planin e hetimit, të cilin opozita pretendon se shumica e miratoi në mbledhjen e kaluar pa praninë e deputetëve opozitarë, duke lënë jashtë Zyrën e Kryeministrit.
Deputetja e LDK-së, Doarsa Kica-Xhelili, kundërshtoi mospërfshirjen e këtij institucioni, duke kërkuar që hetimi t’i përfshijë të gjitha hallkat e përgjegjësisë shtetërore
“A po dojmë me kuptu çka ka ndodhë brenda institucioneve tona? A po dojmë me kuptu çka kanë bo policët e që s’ka ditë me rregullu ministria? Çka ka bo sistemi i drejtësisë e që s’ka ditë me rregullu Ministria e Drejtësisë? Çka ka bo QPS-ja, e që s’ka pasë ndoshta politika prej ministrisë përkatëse? A po dojmë me bo ping-pong teatrik këtu?”, ka thene Xhelili-Kica.
“Unë jam këtu për të trajtuar profesionalisht çdo mekanizëm, çdo veprim, çdo mosveprim e çdo mospërmbushje të detyrimeve ligjore të secilës hallkë institucionale, duke nisur nga QPS-të, gjykata, policia, prokuroria…”, ka thënë Adnan Rrustemi, deputet i LVV-së.
Pavarësisht kërkesave të opozitës për rishqyrtimin e planit të punës dhe vazhdimin e mbledhjes në mënyrë publike, komisioni vendosi që diskutimet për kalendarin e aktiviteteve dhe listën e dokumenteve t’i zhvillojë me dyer të mbyllura.
Komisioni Hetimor Parlamentar u themelua më 29 tetor, me 90 vota të deputetëve, për t’i hetuar përgjegjësitë institucionale në rastin e Arlinda Zekajt, e cila u vra më 25 tetor në Vitomiricë të Pejës, pasi kishte raportuar dhunën dhe kishte kërkuar mbrojtje nga institucionet.
Burimi: RTKLive
