Protestat për vrasjen e Arlinda Zekajt do të vazhdojnë edhe sot në Prishtinë, për të tetën ditë radhazi, me kërkesën për drejtësi dhe përgjegjësi institucionale për rastin e saj.

Protesta, e organizuar nga Kolektivi për Mendim dhe Veprim Feminist, do të nisë në orën 17:00, në sheshin “Zahir Pajaziti” në Prishtinë.

Organizatorët kanë bërë thirrje për mobilizim qytetar, duke theksuar se protestat do të vazhdojnë deri në përmbushjen e kërkesave për drejtësi për Arlindën dhe të gjitha gratë e vrara, si dhe për siguri për gratë që përballen me dhunë.

Ndër kërkesat kryesore të protestuesve është trajtimi i femicidit si urgjencë kombëtare, shkarkimi i ministres së Drejtësisë, Donika Gërvalla, dhe ministrit të Punëve të Brendshme, Xhelal Sveçla, si dhe hetimi dhe ndjekja penale e zyrtarëve institucionalë që dyshohet se kanë neglizhuar rastin e Zekajt.

Po ashtu, ata kërkojnë përgjegjësi nga zyrtarët e institucioneve të drejtësisë, Policisë dhe Qendrës për Punë Sociale, nëse konstatohet se nuk i kanë përmbushur detyrat e tyre në trajtimin e rastit.

Në mesin e kërkesave është edhe sigurimi i banimit social për të mbijetuarat e dhunës në familje, si dhe krijimi i mekanizmave më efektivë për mbrojtjen e grave që janë në rrezik.

Protesta dhe marshime në kërkim të drejtësisë për Arlinda Zekajn janë mbajtur edhe në Pejë, Mitrovicë, Ferizaj dhe Istog.

Sinjali – aty ku e vërteta flet para lajmit!

/GazetaSinjali/

Burimi: Sinjali