Një oficer policie ka vdekur dhe një tjetër ka humbur një këmbë, pasi një mjet shpërthyes ka shpërthyer në vendin ku u raportua për të shtëna armësh, në Spanjën veriore.

Oficerët po i përgjigjeshin njoftimeve për një konflikt të dhunshëm midis familjeve në Oviedo, gjatë të cilit një grua e re u qëllua dhe u plagos, shkruajnë mediat e huaja, përcjell Telegrafi.

Kur oficerët mbërritën në vendngjarje, gjetën mjetin shpërthyes brenda një çante shpine.

Ai shpërtheu ndërsa ata po përpiqeshin ta largonin për ta çaktivizuar.

Oficeri që humbi jetën është identifikuar nga Policia Kombëtare e Spanjës si Juan Jose ndërsa oficeri që humbi këmbën po i nënshtrohet një ndërhyrjeje kirurgjikale në Spitalin Universitar Qendror të Asturias.

Besohet se ai është pjesëtar i njësisë për çaktivizimin e mjeteve shpërthyese.

Duke nderuar oficerët, Policia Kombëtare e Spanjës shkroi në një postim në platformën X: “Jemi të pikëlluar nga vdekja e kolegut tonë Juan José, nga Njësia Speciale e Qenve, gjatë kontrollit të një çante shpine të dyshimtë në Asturias”.

“Zemrat tona janë pranë familjes, miqve, kolegëve dhe njerëzve të tij të dashur”.

Ndërkohë, gruaja që u qëllua gjatë incidentit fillestar ndodhet ende në spital.

Policia njoftoi se janë arrestuar si i dyshuari, ashtu edhe partnerja e tij. /Telegrafi/