Me ardhjen e ditëve të ftohta dhe ndezjen e ngrohjes në banesa, ajri në ambientet e brendshme shpesh bëhet më i thatë. Kjo mund të shkaktojë tharje të lëkurës, irritim të hundës dhe fytit, si dhe kruarje të syve.

Për të lehtësuar këto shqetësime, shumë familje përdorin lagështues ajri. Megjithatë, ekspertët paralajmërojnë se përdorimi i gabuar ose mungesa e mirëmbajtjes së këtyre pajisjeve mund të sjellë pasoja të padëshiruara për shëndetin.
Sipas rekomandimeve të Klinikës Mayo dhe Agjencisë Amerikane për Mbrojtjen e Mjedisit (EPA), lagështia relative në ambientet e brendshme duhet të mbahet ndërmjet 30 dhe 50 për qind. Nëse niveli i lagështisë është brenda këtij intervali, përdorimi i lagështuesit nuk është i nevojshëm.
Si ta kuptoni nëse keni nevojë për lagështues ajri?
Para se të blini një pajisje të tillë, këshillohet të matni nivelin e lagështisë në banesë përmes një higrometri. Disa lagështues modernë kanë edhe matës të integruar, të cilët ndihmojnë në kontrollimin dhe ruajtjen automatike të nivelit të duhur të lagështisë.
Në rastet kur lagështia relative bie nën 30 për qind, përdorimi i një lagështuesi mund të ndihmojë në lehtësimin e shqetësimeve që shkaktohen nga ajri i thatë.
Kur mund të bëhet i dëmshëm përdorimi i tij?
Përdorimi i tepërt i lagështuesit mund të rrisë lagështinë në ambient dhe të krijojë kushte të favorshme për zhvillimin e mykut, baktereve dhe marimangave të pluhurit. Lagështia e lartë mund të shkaktojë gjithashtu kondensim në dritare, mure dhe dysheme.
EPA rekomandon që lagështia në ambientet e brendshme të mbahet nën 60 për qind, në mënyrë që të parandalohet zhvillimi i mykut. Nëse vëreni grumbullim të lagështisë në dritare, perde, qilima apo sipërfaqe të tjera, duhet ta ulni intensitetin e pajisjes ose ta fikni atë.
Personat që vuajnë nga astma ose alergjitë këshillohen të konsultohen me mjekun përpara se të përdorin lagështues ajri.
Pastrimi i pajisjes është thelbësor
Një nga gabimet më të shpeshta gjatë përdorimit të lagështuesve është lënia e ujit për disa ditë në rezervuar. Nëse nuk pastrohet rregullisht, pajisja mund të shpërndajë baktere dhe myk në ajër, duke shkaktuar probleme me frymëmarrjen dhe shqetësime të tjera shëndetësore.
Për të shmangur këto rreziqe, rekomandohet që uji në rezervuar të ndërrohet çdo ditë, ndërsa pajisja të pastrohet të paktën çdo tri ditë, duke respektuar udhëzimet e prodhuesit.
Gjithashtu, nuk këshillohet të shtohen vajra esencialë në rezervuar, përveç rasteve kur lagështuesi është projektuar posaçërisht për këtë funksion.
Cili lloj uji rekomandohet?
Për përdorimin e lagështuesve, ekspertët rekomandojnë ujë të distiluar ose të demineralizuar. Uji i zakonshëm i rubinetit përmban minerale që mund të shpërndahen në ajër dhe të krijojnë një shtresë të bardhë pluhuri mbi mobilie dhe sipërfaqe të tjera.
Kujdes i veçantë duhet treguar edhe në familjet me fëmijë të vegjël. Lagështuesit që prodhojnë avull të nxehtë paraqesin rrezik për djegie në rast se pajisja përmbyset ose uji i nxehtë derdhet.
Lagështuesit e ajrit mund të jenë të dobishëm gjatë sezonit të ngrohjes, por përdorimi i tyre duhet të bëhet vetëm kur është i nevojshëm, duke kontrolluar nivelin e lagështisë dhe duke pastruar pajisjen rregullisht.
Sinjali – aty ku e vërteta flet para lajmit!
Burimi: Sinjali





