Në margjina të Samitit të Liderëve të Procesit të Berlinit, në Mal të Zi, kryeministri i Republikës së Kosovës, Albin Kurti, u takua me Ministrin e Shtetit të Irlandës për Çështjet Evropiane dhe Mbrojtjen, Thomas Byrne.

Duke e falënderuar për përkrahjen e vazhdueshme për Kosovën dhe për kontributin e Irlandës në siguri përmes KFOR-it, kryeministri Kurti tha se mbi 3,000 pjesëtarë të ushtrisë irlandeze kanë shërbyer në Kosovë që nga viti 1999, ndërkaq paraprakisht mbi 1,000 refugjatë shqiptarë nga lufta e Kosovës gjetën strehim në Irlandë.

Ai shtoi se Republika e Kosovës vazhdon të punojë me partnerët, ashtu që progresi demokratik dhe përkushtimi evropian të përkthehen në hapa konkretë drejt anëtarësimit në Bashkimin Evropian.

Në këtë drejtim, u bisedua për avancimin e nevojshëm të Kosovës në këtë rrugë. Kryeministri tha se “muaji nëntor është i rëndësishëm dhe presim që Raporti i Komisionit Evropian të pasqyrojë progresin e arritur dhe që ky progres të marrë formë konkrete përmes marrjes së pyetësorit të Komisionit Evropian”.