Ushtruesja e detyrës së Kryeprokurores së Pejës, Valbona Disha-Haxhosaj, ka kërkuar rritjen e mbikëqyrjes ndaj zyrtarëve policorë gjatë trajtimit të rasteve, me theks të veçantë te dhuna në familje dhe rastet që përfshijnë të miturit.

Kërkesën ajo e ka bërë në një takim me ushtruesin e detyrës së drejtorit të Policisë Rajonale në Pejë, Mirsad Kelmendi, shefin e operativës dhe komandantët e pesë stacioneve policore në Pejë, Klinë, Istog, Deçan dhe Junik.

Sipas njoftimit të Prokurorisë, në takim është diskutuar për bashkëpunimin ndërinstitucional, reagimin e shpejtë dhe koordinimin në trajtimin e rasteve të ndjeshme.

“Gjatë takimit, U.D. e Kryeprokurores, Valbona Disha-Haxhosaj, ka kërkuar nga zinxhiri komandues i Policisë rritjen e mbikëqyrjes dhe kontrollit ndaj zyrtarëve policorë gjatë trajtimit të rasteve, me qëllim të sigurimit të një qasjeje profesionale, të përgjegjshme dhe në përputhje me procedurat ligjore. Ajo ka kërkuar gjithashtu vigjilencë, përkushtim dhe vëmendje të shtuar në trajtimin e rasteve që përfshijnë viktimat e dhunës në familje dhe të miturit”.

Disha-Haxhosaj ka kërkuar që rastet që përfshijnë viktimat, veçanërisht gratë e dhunuara dhe të miturit, të trajtohen me prioritet dhe profesionalizëm, si dhe të përfshihen të gjithë mekanizmat institucionalë përgjegjës për mbrojtjen e tyre.

Palët janë pajtuar për intensifikimin e bashkëpunimit me qëllim të parandalimit të kriminalitetit dhe rritjes së sigurisë publike.

Burimi: Dukagjini