Një grua nga Fushë Kosova është detyruar t’i drejtohet sërish Policisë, pasi bashkëshorti i saj dyshohet se ka shkelur vazhdimisht urdhrin mbrojtës të lëshuar nga gjykata, duke iu afruar edhe në vendin e punës, ndonëse kishte ndalesë gjyqësore për një veprim të tillë, raporton Gazeta Sinjali.
Sipas informacioneve që ka siguruar Sinjali, viktima, A.O. rreth 31-vjeç, është paraqitur në Stacionin Policor në Fushë Kosovë më 26 tetor 2026, rreth orës 10:00, ku ka denoncuar bashkëshortin e saj, E.O. rreth 34-vjeç.
Gruaja ka deklaruar se ndaj bashkëshortit ekziston një urdhër mbrojtës, ndërsa në Drenas është iniciuar edhe një rast për veprën penale “Dhunë në familje”.
Megjithatë, sipas denoncimit, i dyshuari nuk e kishte respektuar urdhrin e gjykatës, duke iu afruar vazhdimisht bashkëshortes brenda distancës së ndaluar.
Një nga incidentet e raportuara kishte ndodhur në marketin “Viva Fresh Store”, në rrugën “Nëna Terezë” në Fushë Kosovë, ku viktima punon.
Sipas deklarimit të saj, bashkëshorti kishte shkuar në market dhe kishte folur me zë të lartë në drejtim të saj, duke shkelur kështu distancën e përcaktuar me urdhrin mbrojtës.
Pas denoncimit, Policia ka njoftuar Prokurorinë e Shtetit, e cila ka urdhëruar ndalimin e të dyshuarit për 48 orë.
34-vjeçari është dërguar në Qendrën e Mbajtjes në Prishtinë.
Rasti është trajtuar për veprat penale “Mospërfillja e Gjykatës” dhe “Ngacmimi”, ndërsa hetimet vazhdojnë për sqarimin e plotë të rrethanave.
Mbetet të verifikohet nëse shkeljet e mëparshme të pretenduara të urdhrit mbrojtës ishin raportuar dhe çfarë masash ishin ndërmarrë për zbatimin e tij.
Shënim: Identiteti i viktimës dhe i të dyshuarit është mbrojtur për shkak të natyrës së rastit. I dyshuari konsiderohet i pafajshëm derisa përgjegjësia e tij të vërtetohet sipas ligjit.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.
Sinjali – aty ku e vërteta flet para lajmit!
Burimi: Sinjali
