Ditët më të shkurtra dhe ekspozimi më i ulët ndaj diellit gjatë vjeshtës dhe dimrit mund të rrisin rrezikun e mungesës së vitaminës D, e cila është e rëndësishme për shëndetin e kockave, funksionimin e muskujve dhe sistemin imunitar.
Dietologia Leah Murnane shpjegon se vitamina D ndihmon trupin të përthithë kalciumin dhe fosforin nga ushqimi, duke kontribuar në ruajtjen e kockave të forta dhe në uljen e rrezikut për fraktura.
Nivelet e ulëta të kësaj vitamine mund të shoqërohen me lodhje, dobësi të muskujve dhe ndryshime të humorit. Personat që kalojnë pjesën më të madhe të ditës brenda ambienteve të mbyllura ose ekspozohen më pak ndaj diellit gjatë dimrit mund të përfitojnë nga përfshirja e ushqimeve të pasura me vitaminë D në dietën e tyre.
Cilat ushqime përmbajnë vitaminë D?
Ndër burimet ushqimore të vitaminës D përfshihen salmoni, skumbria, sardelet, vezët, qumështi i lopës, disa pije me bazë bimore dhe drithërat e fortifikuara me këtë vitaminë.
Vitamina D është e tretshme në yndyrë, ndaj përthithet më mirë kur konsumohet së bashku me ushqime që përmbajnë yndyrna të shëndetshme, si arrat, farat, avokadoja dhe vaji i ullirit.
A nevojiten suplementet e vitaminës D?
Ekspertët theksojnë se marrja e suplementeve nuk sjell domosdoshmërisht përfitime shtesë për personat që tashmë kanë nivele të mjaftueshme të vitaminës D. Ndërsa dozat e tepërta mund të shkaktojnë rritje të kalciumit në gjak dhe dëmtime të veshkave.
Prandaj, para përdorimit të suplementeve në doza të larta, rekomandohet konsultimi me mjekun. Analizat e gjakut mund të jenë të nevojshme për personat me faktorë të caktuar rreziku, megjithëse testimi rutinë nuk është i domosdoshëm për çdo të rritur të shëndetshëm.
Po ashtu, ekspertët paralajmërojnë se ekspozimi i pambrojtur në diell nuk duhet të përdoret si mënyrë për të rritur vitaminën D, pasi djegiet nga dielli shtojnë rrezikun e kancerit të lëkurës.
Sinjali – aty ku e vërteta flet para lajmit!
Burimi: Sinjali
