Katari dhe Turqia kanë nënshkruar një marrëveshje të rëndësishme të mbrojtjes së ndërsjellë, me synimin për të forcuar bashkëpunimin strategjik dhe ushtarak, si dhe për të krijuar një qëndrim të përbashkët përballë çdo sulmi të armatosur nga jashtë.
Marrëveshja u nënshkrua të premten në Stamboll, gjatë takimit mes presidentit turk, Recep Tayyip Erdogan, dhe emirit të Katarit, Sheikh Tamim bin Hamad Al Thani, të cilët bashkëdrejtuan mbledhjen e Komitetit të Lartë Strategjik mes dy vendeve, transmeton Telegrafi.
Sipas një deklarate të përbashkët, marrëveshja synon “forcimin e mbrojtjes kolektive dhe arritjen e sigurisë dhe stabilitetit rajonal”, si dhe “miratimin e një qëndrimi të unifikuar përballë çdo sulmi të armatosur nga jashtë, që synon njërën ose të dyja palët”.
“Palët ranë dakord të zhvillojnë konsultime lidhur me kërcënimet ndaj sigurisë së tyre dhe të forcojnë bashkëpunimin përmes stërvitjeve të përbashkëta ushtarake, bashkëpunimit në industrinë e mbrojtjes dhe shkëmbimit të personelit për trajnim”, thuhet në deklaratë.
Të dyja vendet theksuan se marrëveshja pasqyron vizionin e tyre të përbashkët për një rend rajonal më të sigurt dhe më të qëndrueshëm. Zyra e Erdoganit deklaroi se ajo do t’u japë “një dimension të ri lidhjeve vëllazërore” mes dy shteteve.
Sipas Presidencës turke, Erdogan tha se të dyja vendet do të vazhdojnë të bashkëpunojnë për të parandaluar rifillimin e luftës në rajonin e Gjirit, si dhe për të krijuar kushte për dialog dhe paqe. Ai shtoi se marrëveshja do të zgjerojë edhe bashkëpunimin në industrinë e mbrojtjes.
Gjatë takimit, dy liderët diskutuan gjithashtu sulmet izraelite në Gaza dhe gjendjen humanitare në territorin palestinez, përpjekjet për normalizimin e marrëdhënieve në Siri, si dhe zhvillimet e fundit në Libi.
Përveç marrëveshjes së mbrojtjes, Katari dhe Turqia nënshkruan edhe disa marrëveshje të tjera për bashkëpunimin në tregti, energji, diplomaci, arsim dhe kulturë.
Marrëveshja vjen në një periudhë të ndryshimeve të shpejta në arkitekturën e sigurisë në Gjirin Persik dhe Lindjen e Mesme, të nxitura nga lufta me Iranin dhe sinjalet e SHBA-së për përshtatjen e pranisë së saj afatgjatë të sigurisë në rajon. /Telegrafi/
