Katër shtetas shqiptarë janë dënuar me nga tre vjet burgim në Francë, pasi dyshohen për një seri vjedhjesh në banesa në rajonin e Haut-Rhin dhe në disa zona përreth. Grupi, i cili kishte shkaktuar shqetësim te banorët për shkak të vjedhjeve të përsëritura, u zbulua pas një hetimi disa javësh nga xhandarmëria franceze.

Sipas gazetës franceze Remiremont Vallées, katër të dyshuarit, të gjithë rreth të 30-ave, dyshohet se kishin vepruar si grup i organizuar, duke hyrë në shtëpi dhe duke marrë bizhuteri, ora, para të gatshme dhe pajisje elektronike. Në disa raste, ata kishin dëmtuar dritaret dhe grilat e banesave, ndërsa ambientet e brendshme i kishin lënë tërësisht të përmbysura.

Hetimet u zhvilluan nga njësia e kërkimeve e xhandarmërisë në Colmar, e cila për disa javë kishte vëzhguar lëvizjet e të dyshuarve, kishte analizuar të dhënat telefonike dhe kishte mbledhur dëshmi. Gjithashtu, hetuesit kishin ndjekur një automjet Audi që dyshohej se përdorej nga grupi gjatë lëvizjeve të tij.

Pavarësisht ndërrimit të automjeteve, numrave të telefonit dhe vendeve të qëndrimit, policia arriti t’i lidhte katër shqiptarët me 18 raste të dyshuara të veprimtarisë kriminale.

Operacioni për arrestimin e tyre u zhvillua më 6 nëntor 2026, në një objekt akomodimi në Mortagne, në rajonin Vosges. Gjatë kontrollit, autoritetet zbuluan rreth 20 mijë euro para të gatshme, një numër të madh bizhuterish dhe disa telefona mobilë.

Para Gjykatës së Colmarit, katër të akuzuarit i kundërshtuan në masë të madhe pretendimet ndaj tyre. Megjithatë, gjykata vlerësoi provat e mbledhura gjatë hetimeve, përfshirë përgjimet telefonike, vëzhgimet policore dhe dëshmitë.

Në përfundim të procesit, gjykata vendosi t’i dënojë të katër me nga tre vjet burgim, me mbajtje të menjëhershme në burg. Po ashtu, ndaj tyre u shqiptua edhe ndalimi i përhershëm i hyrjes në territorin francez, i cili do të zbatohet pas përfundimit të dënimit.

Autoritetet kanë konfiskuar sendet e sekuestruara gjatë operacionit, ndërsa objektet e vjedhura që janë identifikuar do t’u kthehen pronarëve. Të dënuarit gjithashtu duhet t’i dëmshpërblejnë viktimat për humbjet e shkaktuara.

Rasti kishte shkaktuar shqetësim të madh te banorët e zonës, disa prej të cilëve kanë treguar se pas vjedhjeve kishin vazhduar të ndiheshin të pasigurt edhe brenda shtëpive të tyre./Telegrafi/