Kompania farmaceutike amerikane Eli Lilly ka prezantuar rezultate premtuese nga një kombinim i ri i dy ilaçeve kundër obezitetit, i cili në një studim ka ndihmuar pacientët të humbin mesatarisht deri në 23.3 për qind të peshës trupore brenda 48 javësh.
Kombinimi, i quajtur EloraTZP, përfshin tirzepatidin, substancën aktive të ilaçit Zepbound, dhe eloralintidin, një medikament eksperimental që vepron mbi mekanizmat hormonalë të ngopjes.
Sipas të dhënave të prezantuara nga kompania në konferencën ObesityWeek në Uashington, pacientët me obezitet dhe diabet të tipit 2 humbën deri në 23.3 për qind të peshës së tyre pas 48 javësh trajtim. Për një person me peshë fillestare prej 105 kilogramësh, kjo përkthehet në rreth 24.5 kilogramë më pak.
Rezultatet përfshijnë edhe përmirësime në treguesit shëndetësorë. Deri në 60 për qind e pjesëmarrësve nuk i plotësonin më kriteret për obezitet, ndërsa deri në 77 për qind arritën nivele normale të sheqerit në gjak.
Një tjetër aspekt i studimit lidhet me ndryshimin e marrëdhënies me ushqimin. Rreth 74 për qind e pacientëve që morën eloralintidin raportuan më pak dëshirë për të ngrënë, veçanërisht për ëmbëlsirat. Gjithashtu, 41 për qind e pjesëmarrësve që konsumonin alkool thanë se kishin reduktuar sasinë e tij, ndërsa gjysma raportuan më pak mendime të vazhdueshme për ushqimin, të njohura si “zhurmë ushqimi”.
Lilly prezantoi gjithashtu të dhëna për retatrutidin, një tjetër ilaç eksperimental që vepron mbi tri objektiva hormonale. Te pacientët me obezitet dhe apnea të gjumit, trajtimi uli ndërprerjet e frymëmarrjes gjatë natës deri në 60.6 për qind. Ndërsa te personat me artrozë të gjurit, u raportua ulje e dhimbjes me rreth 75 për qind.
Kompania solli edhe të dhëna për përdorimin e Zepboundit te adoleshentët e moshës 12 deri në 18 vjeç. Pas 72 javësh, indeksi i masës trupore u ul mesatarisht 21.4 për qind dhe më shumë se gjysma e pjesëmarrësve nuk i plotësonin më kriteret e obezitetit.
Megjithatë, rezultatet e EloraTZP dhe retatrutidit mbeten në fazën e studimeve dhe këto ilaçe nuk janë të aprovuara për përdorim. Të dhënat janë prezantuar nga vetë kompania dhe ende nuk janë publikuar në një revistë shkencore. Efektet anësore të kësaj familjeje medikamentesh, përfshirë të përzierat, diarrenë dhe të vjellat, mbeten një shqetësim i rëndësishëm.
Sinjali – aty ku e vërteta flet para lajmit!
Burimi: Sinjali
