Policia katalanase ka identifikuar njërin nga tifozët që sulmuan lojtarët e Real Madridit gjatë ndeshjes së xhiros së 10-të të La Ligës ndaj Barcelonës, e cila përfundoi me fitoren 2-1 të madrilenëve.

Sipas raportimit të mediumit spanjoll AS, tifozi që goditi mesfushorin e Real Madridit, Eduardo Camavinga, është identifikuar me ndihmën e Barcelonës, ndërsa ndaj tij ka nisur procedura ligjore në bazë të Ligjit për Sportin.

Incidenti ndodhi pas golit të fitores së Real Madridit, kur lojtarët e skuadrës madrilene, përfshirë edhe futbollistët që ndodheshin në stol, festuan pranë tribunës së tifozëve vendas në ‘Camp Nou’.

Në drejtim të tyre u hodhën sende të ndryshme, ndërsa Camavinga, i cili ishte më afër tribunës, u godit disa herë me shkopinj flamujsh nga tifozët e Barcelonës.

Pas ngjarjes, La Liga paraqiti një ankesë zyrtare pranë komitetit disiplinor, duke kërkuar që incidenti të trajtohet në përputhje me rregulloret përkatëse.

Tifozi i identifikuar rrezikon një gjobë deri në 60 mijë euro. Përveç kësaj, atij mund t’i ndalohet pjesëmarrja në ngjarje sportive për një periudhë prej dy deri në pesë vjetësh.

Rasti vjen pas një prej momenteve më të tensionuara të El Clasicos së fundit, ku festa e lojtarëve të Real Madridit pas golit vendimtar u shoqërua me reagime të dhunshme nga një pjesë e tifozëve vendas. /Telegrafi/