Një ekip i Forcës së Sigurisë së Kosovës (FSK) ka marrë pjesë për herë të parë në trajnimin për zhvillimin e liderëve të rinj ushtarakë, të organizuar në Qendrën “Marko Babiq” të Ushtrisë Kroate.

Sipas njoftimit të FSK-së, trajnimi u zhvillua në kuadër të bashkëpunimit bilateral me Kroacinë dhe synoi avancimin e aftësive udhëheqëse dhe profesionale të pjesëtarëve ushtarakë.

Trajnimi u përmbyll me një marshim taktik prej 88 kilometrash, nga Udbina deri te Kalaja e Kninit, ku pjesëmarrësit vunë në sprovë qëndrueshmërinë fizike e mendore, disiplinën, aftësitë udhëheqëse dhe vendimmarrjen në kushte sfiduese.

Në trajnim morën pjesë ushtarakë nga Kroacia, Kosova, Sllovenia, Shqipëria, Maqedonia e Veriut dhe Mali i Zi.

Marshimi përmbyllës kishte edhe domethënie simbolike, duke nderuar historinë dhe sakrificën e popullit kroat gjatë luftës atdhetare.

FSK-ja ka vlerësuar se pjesëmarrja në këtë trajnim paraqet mundësi për shkëmbimin e përvojave, zhvillimin profesional të pjesëtarëve të saj dhe forcimin e bashkëpunimit ushtarak ndërmjet Kosovës dhe Kroacisë.

Burimi: Dukagjini