Qindra mijëra protestues pritet të marrin pjesë në marshime në mbarë Francën, ndërsa pesë sindikata kanë bashkuar forcat për një ditë kombëtare grevash dhe protestash.

Protestat nisën në shtator, fillimisht me nxënës të shkollave të mesme që kundërshtonin kushtet e dobëta dhe mungesën e burimeve në arsim, transmeton Telegrafi.

Më pas, lëvizja u zgjerua duke përfshirë edhe përfaqësues të së ashtuquajturës lëvizje “Jelekët e Verdhë” dhe punëtorë nga sektorë të ndryshëm.

Autoritetet presin që në marshime të marrin pjesë nga 500 mijë deri në 700 mijë persona, ndërsa dhjetëra mijëra të tjerë pritet të dalin në rrugët e Parisit. Një nga drejtuesit sindikalë e ka cilësuar këtë si “një ditë të madhe bashkimi”.

Pesë sindikatat, që përfaqësojnë sektorin publik dhe atë privat, kanë bashkuar kërkesat për rritje të pagave për të përballuar koston e jetesës, si dhe për mbrojtjen e shërbimeve publike.

Ministri i Brendshëm, Laurent Nuñez, ka njoftuar se në terren do të angazhohen 70 mijë policë dhe xhandarë, duke paralajmëruar një “përgjigje jashtëzakonisht të vendosur” ndaj çdo shpërthimi të mundshëm të dhunës.

Për 5 nëntor janë planifikuar më shumë se 250 aksione të ndryshme. Ndërkohë, tashmë janë raportuar ndërprerje të punës në shkolla, spitale dhe në transportin publik.

Punëtorëve u është kërkuar gjithashtu të ndalin prodhimin në rafineritë e naftës. Për shkak të ndërprerjeve në disa centrale bërthamore, Franca pritet të importojë të enjten më shumë energji elektrike sesa prodhon vetë.

Koalicioni i sindikatave u ka bërë thirrje punëtorëve, pensionistëve dhe të rinjve që t’i bashkohen grevës, me qëllim rritjen e presionit ndaj qeverisë. Një nga kërkesat kryesore është rritja e pagës minimale, e njohur si “Smic”, e cila aktualisht është 12,31 euro në orë.

Kryetarja e sindikatës CFDT, Marylise Léon, ka theksuar se kërkesat nuk kufizohen vetëm te paga minimale.

“Ne po kërkojmë një rritje neto prej 100 eurosh në muaj”, deklaroi ajo.

Qeveria është përpjekur të zbusë pakënaqësinë publike për rritjen e çmimeve, duke liruar 10 milionë fuçi naftë nga rezervat strategjike, me qëllim uljen e kostos së karburanteve. Ministrat u kanë premtuar gjithashtu nxënësve reformimin e platformës së kontestuar “Parcoursup”, përmes së cilës bëhet pranimi në universitete, me synimin që ajo të zëvendësohet deri në vitin 2028.

Sipas Ministrisë së Arsimit, të enjten në mëngjes ishin mbyllur 81 lice, shkolla të mesme që frekuentohen nga nxënësit e moshës 15 deri në 18 vjeç. Ministria bëri të ditur gjithashtu se grevat kishin prekur rreth 17,5 për qind të shkollave fillore.

Pjesëmarrje e madhe pritet sidomos në kryeqytet. Léon tha se do të ishte e kënaqur nëse në protesta do të dilnin 800 mijë persona.

Ndërkaq, drejtuesja tjetër sindikale, Sophie Binet, e cila e ka cilësuar këtë aksion si “ditën e madhe të bashkimit”, deklaroi: “Ka ardhur koha që mobilizimi të kalojë në një nivel tjetër; greva duhet të marrë përmasa të gjera”.

Paralelisht, lëvizja “Jelekët e Verdhë”, e cila disa vite më parë organizoi protesta kundër kostos së lartë të jetesës, është riaktivizuar dhe ka bërë thirrje për bllokada e protesta të tjera edhe të premten dhe të shtunën.

Drejtuesit e sindikatave janë ankuar se marshimet e fundit janë mbajtur larg qendrës së Parisit, për shkak të dhunës së shpërthyer në disa qytete më 17 tetor. Gjatë atyre trazirave, më shumë se 2 mijë dyqane u plaçkitën dhe disa ndërtesa historike u dogjën.

Marshimi i së enjtes do të lejohet të kalojë në qendër të Parisit, por jo përgjatë itinerarit të propozuar nga sindikatat, i cili do të lidhte sheshin Bastille me sheshin Concorde. Ky itinerar do t’i afronte protestuesit pranë Asamblesë Kombëtare, Pallatit Élysée dhe rezidencës së kryeministrit, Hôtel Matignon.

Në vend të tij, marshimi pritet të zhvillohet përgjatë një rruge tjetër qendrore, nga sheshi République deri te sheshi Nation. Sindikata CFDT është ankuar se marrja e miratimit gjyqësor për itinerarin vetëm të mërkurën në mbrëmje e ka vështirësuar organizimin e protestës.

Mobilizimi i madh i fundjavës së kaluar përfundoi me relativisht pak incidente dhune. Ministri i Brendshëm tha se edhe të enjten do të angazhohet një numër i ngjashëm forcash policore.

Nuñez ka paralajmëruar për tri rreziqe të mundshme: përfshirjen e grupeve radikale të majta të njohura si “black blocs”, plaçkitjet dhe marshimet spontane që zhvillohen pa autorizimin e sindikatave. /Telegrafi/