Alejandro Balde po e shqyrton mundësinë e largimit nga Barcelona në afatin kalimtar të janarit 2027, pasi ka humbur hapësirën në planet e trajnerit Hansi Flick.
Mbrojtësi i majtë 23-vjeçar ka regjistruar vetëm 124 minuta lojë në pesë ndeshje këtë sezon, një statistikë që pasqyron rënien e rolit të tij në skuadrën katalunase.
Situata e futbollistit të dalë nga akademia e Barcelonës është përkeqësuar gjatë javëve të fundit. Madje, ai ka mbetur në stol edhe në ndeshje kur lëndimet kanë kufizuar alternativat e Flickut në repartin defensiv.
Rasti më i fundit ishte përballja me Atletico Madridin. Barcelona u paraqit pa Jules Kounden dhe Xavi Espartin, ndërsa Andreas Christensen dhe Eric Garcia sapo ishin rikthyer nga lëndimet.
Pavarësisht këtyre mungesave, Flick vendosi ta aktivizojë Brian Farinas në krahun e djathtë të mbrojtjes dhe Joao Cancelon në të majtin, duke e lënë sërish Balden në pankinë.
Vendimi i trajnerit gjerman u bë edhe më domethënës gjatë pjesës së dytë. Pas pushimit, Flick e zëvendësoi Farinas dhe vendosi Frenkie De Jongun në pozitën e mbrojtësit të djathtë, në vend që t’i jepte mundësinë Baldes dhe ta zhvendoste Cancelon në krahun tjetër.
Kjo nuk ishte hera e parë që mbrojtësi spanjoll kishte pak hapësirë për lojë. Në ndeshjen kundër Alavesit, ai u aktivizua vetëm në minutën e 62-të, ndërsa në përballjen ndaj Aston Villas në Ligën e Kampionëve luajti vetëm tetë minutat e fundit.
Në këtë situatë, Roma ka shfaqur interesim për transferimin e Baldes dhe po përgatit një ofertë për të. Barcelona thuhet se e vlerëson mbrojtësin rreth 40 milionë euro, shumë që mund ta bëjë të mundur një marrëveshje në afatin kalimtar të janarit.
