Një anije luksoze turistike është përplasur me dy anije transportuese kontejnerësh gjatë largimit nga porti i Bremerhavenit, në veriperëndim të Gjermanisë, pasi erërat e forta e shtynë drejt tyre.

Autoritetet konfirmuan se incidenti shkaktoi dëme të konsiderueshme, por nuk pati të lënduar dhe as depërtim të ujit në anijet e përfshira, transmeton Telegrafi.

Ngjarja ndodhi të dielën, më 25 tetor, kur anija e kroçerës Mein Schiff 3 po përgatitej të nisej drejt Ishujve Kanarie të Spanjës, me ndihmën e rimorkiatorëve.

Sipas policisë së Bremenit, ndërsa anija po afrohej te kalata, një erë e fortë, në kushtet e motit të stuhishëm, e shtyu drejt dy anijeve të kontejnerëve që ishin të ankoruara pranë saj.

Pamjet e regjistruara nga një person në bordin e kroçerës tregojnë se ana e djathtë e Mein Schiff 3 iu afrua anijes MSC Victorine, përpara se varkat e shpëtimit të montuara në anijen turistike të përplaseshin me të.

Fotografitë e publikuara nga mediat gjermane tregojnë se disa prej varkave të shpëtimit u dëmtuan rëndë. Gjithashtu, barrierat prej xhami përgjatë skajit të anijes u thyen dhe u zhvendosën nga goditja.

Sipas policisë, anija më e vogël e kontejnerëve pësoi dëme të lehta, ndërsa ajo më e madhja u dëmtua ndjeshëm. Përplasja çau disa metra të anës së majtë të anijes më të madhe dhe deformoi strukturat udhëzuese për kontejnerët.

Ndërkohë, Mein Schiff 3 pësoi dëme të konsiderueshme në varkat e shpëtimit, vinçat përkatës dhe trupin e anijes.

Autoritetet konfirmuan se nga përplasja nuk pati depërtim të ujit në asnjërën prej anijeve dhe se nuk u raportuan të lënduar. Hetimet e Policisë Ujore të Bremenit për rrethanat e incidentit janë ende në vazhdim.

Një zëdhënës i kompanisë gjermane TUI Cruises, pronare e Mein Schiff 3, konfirmoi se anija ka kapacitet për 2,506 pasagjerë dhe ka nisur operimin në vitin 2014.

Sipas kompanisë, menjëherë pas incidentit, ekipet teknike dhe ekspertët kryen një inspektim të hollësishëm, i cili përcaktoi se anija ka nevojë për riparime në kantier detar. Për këtë arsye, Mein Schiff 3 mbetet e ankoruar në Bremerhaven.

Si pasojë e dëmeve, TUI Cruises anuloi pjesën e mbetur të udhëtimit drejt Ishujve Kanarie.

Kompania shprehu keqardhje për zhgënjimin dhe shqetësimin që ky vendim do t’u shkaktojë pasagjerëve, duke theksuar se anulimi ishte i nevojshëm për të ruajtur standardet e sigurisë.

Ndërkohë, autoriteti për sigurinë detare ka vendosur ndalim lundrimi për të tri anijet e përfshira në incident, deri në përmbushjen e kushteve të përcaktuara nga autoritetet. /Telegrafi/