Një intervenim i Policisë në fshatin Landovicë të Prizrenit ka përfunduar me arrestimin e një 22-vjeçari, i cili dyshohet se ka kërcënuar një zyrtar policor pasi ky i fundit i kërkoi të largohej nga vendi i ngjarjes. I riu nuk iu bind urdhrit dhe iu drejtua policit me fjalë kërcënuese, mëson ekskluzivisht Gazeta Sinjali.
Ngjarja ka ndodhur të dielën, më 8 nëntor, rreth orës 19:35, gjatë një intervenimi policor për një rast tjetër të kanosjes.
Sipas informacioneve që ka siguruar Sinjali, i arrestuari është Dardan Morina (22), i cili, pasi kishte refuzuar urdhrin e zyrtarit policor për t’u larguar nga vendngjarja, dyshohet se e kishte kërcënuar drejtpërdrejt.
“Me ty kam punë personalisht, prej nesër e anej unë kam mu marrë me ty, dije mirë”, janë fjalët që 22-vjeçari dyshohet t’ia ketë drejtuar policit.
Pas kërcënimit, zyrtarët policorë kanë ndërhyrë duke e arrestuar të dyshuarin, i cili është shoqëruar në Stacionin Policor Prizren-Veri.
Për rastin janë njoftuar njësitë përkatëse hetimore dhe Prokuroria e Shtetit.
Me vendim të Prokurorisë, ndaj Dardan Morinës është iniciuar rasti për veprën penale “Kanosje ndaj personit zyrtar”, ndërsa i dyshuari është dërguar në mbajtje.
Shënim. I akuzuari prezumohet i pafajshëm derisa fajësia e tij të vërtetohet me aktgjykim të formës së prerë.
Sinjali – aty ku e vërteta flet para lajmit!
Burimi: Sinjali
